आईएलओको शतवार्षिकीमा प्रधानमन्त्री
![आईएलओको शतवार्षिकीमा प्रधानमन्त्री](https://annapurnapost.prixacdn.net/media/albums/KP-Oli-PM_20190415003335_DAYU4a7DBU.jpg)
काठमाडौं : प्रधानमन्त्री केपी ओलीले सोमबार अन्तर्राष्ट्रिय श्रम संगठन (आईएलओ)को सतवार्षिकी कार्यक्रममा सहभागिता जनाए । देशको पछिल्लो अवस्था, श्रम सम्मान, रोजगारी र नेपालीले विदेशमा गरेका काम र ती देशसँगको सहकार्यबारे पनि उनले धारणा राखे । सम्मेलनमा सहभागीसहित केही साइडलाइन वार्ता पनि उनले गरे । उनले नर्वेका समकक्षी इर्ला शोलवर्ग, टर्कीका उपराष्ट्रपति र राष्ट्रसंघीय अधिकारीहरूसँग छुट्टा छुट्टै भेटवार्ता गरे ।
प्रधानमन्त्री ओली स्विट्जरल्यान्डको जेनेभाबाट सोमबार नै बेलायत प्रस्थान गरेका छन् । उनले बेलायती समयअनुसार सोमबार साँझ (नेपाली समयअनुसार मंगलबार बिहान सवा १ बजे) अक्सफोर्डमा शान्ति, प्रजातन्त्र र विकासबारे प्रवचन दिने छन् । उनलाई बेलायतको हिथ्रो विमानस्थलबाट हेलिकप्टरमा नै अक्सफोर्ड लैजाने तयारी छ । उनले मंगलबार साँझ बेलायती समकक्षी टेरेजा मेलाई भेट्ने छन् । उनले बेलायती राजकुमार ह्यारीसँग पनि भेटवार्ता गर्ने छन् । उनी तीन दिन बेलायत बसेर फ्रान्स जाने छन् ।
यसबीच प्रधानमन्त्री ओलीले सबैको साथ लिएर देश विकासमा अग्रसर भएको बताएका छन् । उनले जेनेभामा त्यहाँ रहेका नेपाली र नेपाललाई माया गर्ने विदेशीसमक्ष स्थायी नियोगको कार्यक्रममा यस्तो धारणा राखेका हुन् । लामो द्वन्द्वको समाधान गर्दै संविधानसभाबाट तयार पारेको संविधानअनुसार चुनाव भएको भन्दै उनले सरकार जनताको चाहना आत्मसात् गर्दै अघि बढेको बताए ।
प्रधानमन्त्री ओलीले स्वेदश तथा विदेशमा रहेका नेपालीको साथ र सहयोगमा नै विकास अघि बढ्ने पनि स्पष्ट पारे । लामो बलिदानपूर्ण संघर्षपछि जनताले ठूलो विश्वास गरेको यतिबेलाको सरकार सुशासन र तीव्र आर्थिक वृद्धिलाई मुख्य ध्येय बनाएर अघि बढेको पनि उनले बताए । उनले गैरआवासीय नेपालीको नागरिकतासम्बन्धी माग र भावनाप्रति आफू जानकार रहेको बताए । उनले त्यहाँ नेपालीसँग अन्तरक्रिया पनि गरेका थिए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)