धनगढी : थरुहट÷थारुवान संयुक्त संघर्ष समितिले आगामी भदौबाट थरुहट प्रदेशको मागसहित भण्डाफोर अभियानमा जाने भएको छ । आइतबार धनगढीमा पत्रकार सम्मेलनको आयोजना गरी थरुहट ÷थारुवान संयुक्त संघर्ष समितिले भदौ ७ गते टीकापुरमा राष्ट्रिय सम्मेलन गर्ने र आफ्ना विगत देखिकै मागहरू अघि सार्दै भण्डाफोर अभियानमा जाने घोषणा गरेको हो ।
उनीहरुले सारेका मागमा पहिलो बुँदामा कञ्चनपुरदेखि चितवनसम्मका ९जिल्ला समेटेर तराइको छुट्टै थरुहट प्रदेश बनाउनुपर्ने माग छ । यही विषयमा २०७२ भदौ ७ गते टीकापुरमा थरुहट÷थारुवान आन्दोलनका क्रममा आन्दोलनकारी र प्रहरीबीचको दोहोरो झडपमा परी १ नाबालक र ८ प्रहरीको ज्यान गएको थियो ।
अहिले संविधान संशोधनसहित टीकापुर घटनालाई राजनीतिक रूपमा समाधान गरिनुपर्ने, लाल आयोगको प्रतिवेदन सार्वजनिक गर्नुपर्ने, टीकापुर घटनापछि थारुहरूमाथि अन्याय भएको विषयमा छानबिन गरिनुपर्ने लगायतका मागहरु समेटिएका छन् ।
पत्रकार सम्मेलनमा फागुन २२ गते अदालतबाट रिहा भएका थारु नेता लक्ष्मण चौधरीले नेपालको संविधान जलाउने अभिव्यक्ति दिएका समेत दिए । ‘हामीलाई यो देशको नयाँ बनेको संविधानले अन्याय ग¥यो,’ उनले भने ‘संविधानमार्फत हामीलाई यो देशको नागरिकको व्यवहार पनि गरिएन, त्यस कारण हामी आगामी भदौ ७ गते टीकापुरमा संविधान च्यादैछौं, जलाउँदैछौँ ।’ यो संविधानलाई जस्ताको त्यस्तै स्वीकार्न तयार नरहेको उनले बताए ।
टीकापुर घटनालाई राजनीतिक मुद्दाको संज्ञा दिँदै उनले भने ‘हामीलाई झुठा मुद्दा लगाएर ४२ महिनासम्म जेलमा कोचेर राखियो । हामी सात नम्बर प्रदेशमा बस्नै चाहँदैनो, हामीलाई यो स्वीकार्य छैन । कोही थरुहट प्रदेशदेखि आतंकीत छन् भने भीम रावल प्रदेश राखिदिनुस् ।’
चौधरीले भदौ ७ गते टीकापुरमा शान्तिपूर्णरुपमा युवादस्तासहित १० हजार जनता सडकमा उतार्ने बताए । शान्तिपूर्ण प्रदर्शन गर्ने र त्यसमा दमन प्रतिकार गर्न आफूहरु तयार रहेको उनले चेतावनी दिए ।
प्रतिक्रिया दिनुहोस !
