जोमसोम : म्याग्दीको रघुगंगा गाउँपालिका १ तिप्ल्याङमा जीपमा सवार यात्रु लुट्न खोज्ने ३ जना लुटेरालाई म्याग्दी प्रहरीले पक्राउ गरेको छ । म्याग्दी प्रहरीका सूचना अधिकारी प्रहरी निरीक्षक धुव्रप्रसाद शर्माका अनुसार पोखरादेखि मुस्ताङको लोमान्थाङतर्फ जाँदै गरेको ग १ ज ५९०९ नम्बरको भाडाको जीप रोकेर ३ बजेतिर लुटेराले यात्रुको सामान लुटपाट गरेका हुन् । जीपमा सवार ६ जना यात्रु लोमान्थाङ गाउँपालिका २ छोसेर निवासी हुन् ।
सडक अन्धकार भएको अवस्थामा जीप रोकेर यात्रु लुटेको आरोपमा म्याग्दी रघुगंगा गाउपालिका १ का यनज पूर्जा, म्याग्दी अन्नपूर्ण गाउँपालिका ७ हिस्तानका समिट पुन र पर्वत जलजला गाउँपालिका १ का कुशल पाइजालाई पक्राउ गरिएको सूचना अधिकारी प्रहरी निरीक्षक शर्माले जानकारी दिए । जीपका यात्रु लुट्ने लुटेराको समूहले केही नगद र लत्ताकपडा लगेको जानकारी प्राप्त भएको शर्माले बताए ।
यस्तै जीपमा सवारी यात्रु कर्मा नाम्ग्याल गुरुङले जीप रोकेर लुटेराले नगद, झोला र लत्ता कपडा लगेको जानकारी दिए। उनीहरुले झोला खोलेर कपडा कालिगण्डकीमा फालेको र केही योजना संम्झौताका आवश्यक कागजपत्र समेत छरपष्ट पारेको उनले बताए।
म्याग्दी बेनी–मुस्ताङ सडकमा यात्रुमाथि लुटपाटको घटना यो पहिलो भएको प्रहरीले बताएको छ । घटनाको जानकारी पाउने बित्तिकै म्याग्दी प्रहरीले लुटेरा पक्रन सफल भएको जीपका यात्रु नाम्ग्यालले जानकारी दिए । उनका अनुसार उक्त जीप छुसाङ –लोमान्थाङ रुटमा चल्ने भएपनि काम विशेषले पोखरा झरेको थियो । जीपका मालिक लोमान्थाङ गाउपालिका –५ का ढुके गुरुङ भएको उनले बताए ।
पक्राउ परेका ३ जना लुटेराको समूहलाई आवश्यक अनुसन्धानका लागि प्रहरीले नियन्त्रणमा लिएको म्याग्दी प्रहरीले जनाएको छ ।
प्रतिक्रिया दिनुहोस !
