उपचारको क्रममा महिलाको मृत्युपछि अस्पतालमा तोडफोड र प्रदर्शन, पाँच पक्राउ

विराटनगर : विराट नर्सिङ होम एवं विराटनगर अस्पतालमा उपचाररत एक महिलाको मृत्यु भएपछि आफन्तले अस्पतालमा तोडफोड गर्नुका साथै दिनभर प्रदर्शन गरेका छन् ।

चिकित्सकले उपचारमा लापरवाही गरेको भन्दै उनीहरुले आन्दोलन गरेका हुन् । मोरङको उर्लाबारी नगरपालिका–५ की ३८ वर्षीय प्रिती भनिने चेलीमाया प्रसाई कोइरालाको उपचारको क्रममा मृत्यु भएको थियो । मृतकका आफन्तले शव जिम्मा लिन अस्वीकार गर्दै दिनभर प्रदर्शन गरेका हुन् । जसले गर्दा अस्पताल परिसर दिनभर तनाबग्रस्त नै बनेको थियो । प्रहरीका अनुसार ६ वटा झ्याल तोडफोड भएको छ । प्रदर्शनको क्रममा अस्पतालका झ्याल, ढोका, कम्प्युटर र कुर्सीमा समेत क्षति पुगेको छ ।

स्त्री रोग विशेषज्ञ डा। ज्ञानेन्द्रमान सिंह कार्कीको नेतृत्वको चिकित्सक टोलीले चेलीमायाको डाइग्नोस्टिक ल्याप्रोस्कोपी गरेको थियो । डाइग्नोस्टिक ल्याप्रोस्कोपी सकिएपछि उनलाई वार्डमा सारिएको थियो ।

तर शुक्रबारबाट स्वास्थ्य अवस्था जटिल बनेर गएको भन्दै महिलालाई चिकित्सकको सुझाव अनुसार आईसीयूमा भर्ना गरियो । शनिबार बिहान ९ बजेपछि चेलीमायालाई अस्पतालले मृत घोषित गरेको हो । अस्पतालका प्रशासन प्रमुख पदम बिडानीका अनुसार डिस्चार्ज दिने तयारी गरिरहँदा चेलीमायाको अवस्था जटिल बनेको थियो ।

शनिबार मृतकका आफन्तले अस्पताल मूलगेटमै टायर बालेर घटनाको विरोधमा प्रदर्शन गरेका थिए । प्रदर्शनका कारण कोसी राजमार्ग अन्तर्गत विराटनगरको मुनालपथमा केही बेर सडक अवरुद्ध भयो ।

प्रदर्शनकारीमध्ये ५ जनालाई अस्पताल तोडफोड र राजमार्ग बन्द गराउने घटनामा संलग्न रहेको भन्दै प्रहरीले पक्राउ गरेको छ । साथै अहिले अस्पतालको सुरक्षा व्यवस्था कडा पारिएको मोरङ प्रहरी प्रवक्ता डीएसपी घनश्याम श्रेष्ठले बताएका छन् ।