धरान : धरान उपमहानगरपालिकामा ५० दिनदेखि फैलिएको डेंगु रोगको प्रकोप अझै नियन्त्रणमा आउन सकेको छैन्। लामो समयसम्म डेंगु नियन्त्रण हुन नसक्दा पनि प्रदेश सरकारले नियन्त्रणका लागि कुनै योजना अगाडि सारेको छैन।
जेठको सुरुदेखि देखा परेको डेंगु नियन्त्रणका लागि धरान उपमहानगरले जनप्रतिनिधि, कर्मचारी, टोल विकास समितिका सदस्य परिचालन गरी लामखुट्टे मार्ने अभियान चलाएको भए पनी डेंगु नियन्त्रण हुन सकेको छैन्।
धरान उपमहानगरपालिकाकी कार्यबाहक मेयर मञ्जु भण्डारीले जनशक्ति अभावका साथै केन्द्र र प्रदेश सरकारको सहयोग नपाएका कारण धरानमा प्रकोपका रुपमा देखापरेको डेंगु नियन्त्रणमा समस्या भएको बताइन्।
धरान उपमहानगरपालिकाले डेंगु नियन्त्रणका लागि सक्दो प्रयास गरेको भएपनी दक्ष जनशक्तिको अभावमा नियन्त्रणमा आउन नसकेको उनको भनाइ छ।
एडिज एजिप्टाई तथा एडिज अल्बो पिक्टसनामक लामखुट्टेले मानिसलाई टोकेपछि डेंगु रोग लाग्ने बीपी कोइराला स्वास्थ्य विज्ञान प्रतिष्ठान धरानका सहायक प्रवक्ता डा. अशोक ऐरले जानकारी दिए।
धरानमा खानेपानी समस्याका कारण सर्वसाधारणले पानी खुला भाडामा जम्मा गर्ने गरेका कारण डेंगु नियन्त्रण बाहिर पुगेको उनको भनाइ छ। 
प्रतिक्रिया दिनुहोस !
