वीरगन्ज : सरकारले हरेक वर्षझैं यस वर्ष पनि असार १ देखि भदौ १५ सम्म साढे दुई महिनाका लागि खोला वा नदीबाट ढुङगा , गिटटी ,बालुवालगायतका नदीजन्य पदार्थको उत्खनन् र निकासीमा प्रतिबन्ध लगाएको छ। तर पर्सामा भने स्थानीय तहका जनप्रतिनिधिले नै सरकारको निर्णयलाई लत्याएर अवैधरुपमा खोलाको दोहन गरेको घटना बाहिर आएको छ।
पर्साको पर्सागढी नगरपालिका-१ मा पर्ने कर्जनीया कोइलाभार खोलाबाट अवैधरुपमा गिट्टी बालुवा उत्खनन् गरी चोरी निकासी गर्दै गरेको अवस्थामा प्रहरीले ९ वटा टयाक्टर र एउटा जेसीबी नियन्त्रणमा लिएपछि यो तथ्य बाहिर आएको हो।
प्रहरीले ना ४ त ५७२५ , ना ३ त ४६९३ , ना ५ त ३५६८ , ना २ त ३८४४ , ना ३ त ४४७ , ना ६ त ४४१२ , ना २ त ८८५४ , ना ६ त २६९९ र ना ४ त ३४९७ नम्बरको टयाक्टरका साथै अनटेष्ट नम्बर प्लेट भएको एउटा जेसीबी नियन्त्रणमा लिएको हो।
प्रहरीले टयाक्टर र जेसीबीका चालकलाई पनि नियन्त्रणमा लिएको छ।रातिको समयमा खोलाबाट गिटटी बालुवाको चोरी निकासी भइरहेको सूचनाका आधारमा इलाका प्रहरी कार्यालय पेटर्वा सुगौली, इलाका प्रहरी कार्यालय एकटाँगा , प्रहरी चौकी मनवा र रंगपुरटाँडीको संयुक्त प्रहरी टोलीले ती १० वटा सवारी साधन नियन्त्रणमा लिएको प्रहरी निरीक्षक आशीष अधिकारीले जानकारी दिए।
राति ९ बजेको समयमा खोलामा प्रहरीको टोली पुग्दा १५÷१६ वटा टयाक्टर र एउटा जेसीबीले गिटटी बालुवा उत्खनन् गरिरहेका थिए, प्रहरी निरीक्षक अधिकारीले भने, 'प्रहरी पगे लगत्तै केही चालक टयाक्टर लिएर भाग्न सफल भए। ९ वटा टयाक्टर र एउटा जेसीबी मात्रै नियन्त्रणमा लिन सक्यौं।'
खोलाबाट नियन्त्रणमा लिइएका टयाक्टर र जेसीबी आइतबार डिभिजन वन कार्यालय पर्सामा बुझाइएको पर्साका प्रमुख जिल्ला अधिकारी नारायणप्रसाद भट्टराइले जानकारी दिए। वडा नम्बर १ का वडाध्यक्ष तुलाराम महत्तोले आफूहरुको सहमतिमा खोलामा टयाक्टर र जेसीबी पठाइएको बताएका छन् । उनका अनुसार प्रदेश सांसद राजेश्व साह तेलीको संसदीय कोषको २० लाख रुपैयाँ बजेटबाट पर्सागढी नगरपालिका वडा नम्बर १ मा पर्ने कोइलाभारदेखि भटनीसम्मको सडकमा माटो पुरेर ग्राभेल हाल्ने काम चलिरहेको छ।
त्यहि योजनाका लागि उपभोक्ता समितिले गिट्टी बालुवा उत्खनन्का लागि शनिबार राति कर्जनीया कोइलाभार खोलामा टयाक्टर र जेसीबी पठाएको वडाध्यक्ष महत्तोले बताए। सरकारले साढे २ महिनाका लागि गिट्टी बालुवाको उत्खनन्मा प्रतिबन्ध लगाएको भएपनि असार मसान्त सकिन लागिरहेका बेला योजनाको काम सक्नुपर्ने बाध्यता रहेकाले गाउँसमाजकै सहमतिमा खोलामा टयाक्टर र जेसीबी पठाइएको उनले बताए ।
वडाध्यक्ष महत्तोले भने, 'हुन त असारदेखि भदौ मसान्तसम्म खोलामा उत्खनन् गर्न पाइदैन, तर गाउँको विकासको काम भएको र अन्तिम स्थिति भएकाले गाउँसमाज सबैको सल्लाहमै खोलामा टयाक्टर र जेसीबी पठाएका हौं। उपभोक्ता समितिका अध्यक्ष किसन पटवारी भने सम्पर्कविहीन छन्।
प्रतिक्रिया दिनुहोस !
