रानीपोखरीको बालगोपालेश्वर पुनर्निर्माण गर्न सम्झौता
काठमाडौं : रानीपोखरीस्थित बालगोपालेश्वर मन्दिर पुनर्निर्माणका लागि सम्झौता भएको छ। मन्दिर, मन्दिरसम्म पुग्ने पुलका साथै पोखरी वरिपरिको बगैंचा पुनर्निर्माण हुने भएको हो।
राष्टिय पुनर्निर्माण प्राधिकरण र निर्माण कम्पनी सीए/तुलसी कन्ट्रक्सन जेभीबीच मंगलबार सम्झौतापत्रमा हस्ताक्षर भएको छ।
पत्रमा प्राधिकरणका सहसचिव एवं सम्पदा संरक्षण, सार्वजनिक भवन तथा पूर्वाधार महाशाखा प्रमुख शिवहरि शर्मा र कम्पनीका तर्फबाट शान्तकुमार श्रेष्ठले हस्ताक्षर गरे। १४ करोड २७ हजार ५ सय ५७ रुपैयाँमा निर्माण हुनेछ। प्राधिकरणका प्रमुख कार्यकारी अधिकृत सुशील ज्ञवालीले बालगोपालेश्वर प्रताप मल्लकालीन शिखर शैलीमा बन्ने बताए।
प्राधिकरणका कार्यकारी सदस्य डा. चन्द्रबहादुर श्रेष्ठले रानीपोखरीको पुनर्निर्माण गर्दा मन्दिर पुनर्निर्माणमा र मन्दिर पुननिर्माण गर्दा रानीपोखरी पुनर्निर्माणमा असर नपार्ने गरी समन्वयात्मक ढंगले काम गर्न सुझाव दिए।
निर्माण व्यवसायी शान्तकुमार श्रेष्ठले प्राधिकरण, उपभोक्ता समिति लगायतसँग सहकार्य र समन्वय गर्दै सम्पदाको मौलिकतालाई विशेष ध्यान दिएर बालगोपालेश्वर मन्दिर, पुल र वरिपरिको क्षेत्रमा पुनर्निर्माणको काम गर्ने प्रतिबद्धता जनाए।
रानीपोखरी उपभोक्ता समितिमार्फत रानीपोखरीको पिँध र वरिवरि पर्खाल लगाउने काम भइरहेको छ।