ढुवानी ठप्प हुँदा उद्योग बन्द हुने अवस्थामा, भन्सारको राजश्वमा पनि असर

वीरगन्ज : साउन १ गतेदेखि ढुवानी व्यवसायीहरु मालवाहक गाडी थन्काएर हड्तालमा उत्रिएका कारण त्यसको प्रत्यक्ष असर वीरगन्ज पथलैया औद्योगिक कोरिडोरमा परेको छ ।

सरकारले साउन १ गतेदेखि ढुवानी व्यवसायलाई मूल्य अभिवृद्धि कर (भ्याट)को दायरामा ल्याउनुका साथै अनलाइन मार्फत् निगरानी गर्ने नीति लागु गरेपछि त्यसको विरोधमा व्यवसायीहरु उत्रिएका हुन् ।

उक्त निर्णयको खारेजीको माग गर्दै देशभरका ढुवानी व्यवसायीहरू १ गतेदेखि नै गाडी थन्क्याएर हड्तालमा उत्रिएका हुन् । ढुवानी व्यवसायीहरुको हड्तालका कारण बुधबारदेखि मालसामानको ढुवानी ठप्प भएपछि वीरगन्ज पथलैया औद्योगिक कोरिडोरमा रहेका साना ठूला गरी करिब सात सय उद्योग बन्द हुने अवस्थामा छन् ।

सरकारको निर्णय खारेज नभएसम्म ढुवानी ठप्प : व्यवसायी

सामान तस्करी रोक्ने बहानामा मालबाहक सवारीसधानमा राजस्व थोपर्ने र प्राविधिक झमेला खडा गर्ने काम मात्रै भएको व्यवसायीको गुनासो छ । ढुवानी भाडामा भ्याट लगाउने निर्णय फिर्ता नलिएसम्म ढुवानी सेवा पूर्ण रुपमा बन्द रहने उनीहरुको चेतावनी छ ।

नेपाल ट्रक यातायात व्यवसायी महासंघका अध्यक्ष राजेन्द्र श्रेष्ठले आफूहरूले पटकपटक गरेको आग्रहमा समेत सरकारले बेवास्ता गरेपछि कठोर आन्दोलन गर्नुपरेको बताए । सरकार र सत्तारुढ राजनीतिक दलका नेताहरुसँग आफ्नो समस्या राख्दा पनि सम्बोधन हुन नसकेको भन्दै बाध्य भएर आन्दोलना उत्रिएको उनले बताए ।