काठमाडौं : जापानी कार निर्माता कम्पनी निसानले विश्वभरबाट १० हजारभन्दा बढी कामदार कटौती गर्ने योजना सार्वजनिक गरेको छ। निसानले गत मे महिनामा पनि चार हजार ८ सय कामदार हटाउने योजना सार्वजनिक गरेको थियो।
निसानमा विश्वभर एक लाख ३९ हजार कामदार र कर्मचारी कार्यरत छन्। कम्पनीका पूर्व प्रमुख कार्लोस घोस्नको गिरफ्तारी र संयुक्त राज्य अमेरिका तथा युरोपमा कारको बिक्री घटेपछि कम्पनीमा समस्या उत्पन्न भएको छ।
निसानका एक जना प्रवक्ताले कर्मचारी कटौतीबारे सोधिएको प्रश्नमा कुनै प्रतिक्रिया दिन अस्वीकार गरे। जापानको निक्की दैनिकले बुधबार प्रकाशन गरेको समाचारमा अमेरिकामा कारको बिक्रीमा भएको मन्दीले निसानको सञ्चालन मुनाफामा पहिलो चौमासिक अवधिमा करिब ९० प्रतिशत कमी रहेको उल्लेख छ। यही विवरण बिहीबार कम्पनीले सार्वजनिक गर्न लागेको पनि निक्कीले लेखेको छ।
निसानको पछिल्लो समय फ्रान्सेली साझेदार कार निर्माता कम्पनी रेनोसँग पनि विवाद चुलिएको छ। रेनोको जापानी कार निर्माता निसानमा करिब ४३ प्रतिशत सेयर लगानी छ। निसानको कर्मचारी कटौती योजनाले दक्षिण अमेरिका समेतका अरु केही क्षेत्रमा स्थापित कारखानामा असर पर्नेछ। खासगरी ज्यादै कम नाफा भइरहेका क्षेत्रका कारखाना बन्द हुनेछन्।
प्रतिक्रिया दिनुहोस !
