अमेरिकी सीमाकाे पर्खालदेखि फिलिपिन्सको भूकम्पसम्म, कहाँ के भयाे ?

ट्रम्पले पाउने भए मेक्सिको सीमामा पर्खाल लगाउन साढे २ अर्ब डलर

वासिङ्टन : अमेरिकाको सर्वोच्च अदालतले मेक्सिकोसँगको पर्खाल लगाउन राष्ट्रपति डोनल्ड ट्रम्पले सैनिक कोषबाट साढे २ अर्ब डलर खर्च गर्न पाउने भन्दै फैसला गरिदिएको छ ।

राष्ट्रपतिले सीमा क्षेत्रमा पर्खाल लगाउन उक्त रकम प्रयोग गर्ने भनेपछि त्यसको विपक्षमा र पक्षमा अदालतमा मुद्दा परेको थियो । २०१६ को चुनावदेखि नै आफ्नो नारा बनाउँदैआएका ट्रम्पले भने अदालतको फैसलालाई आफ्नो ठूलो जित भन्दै प्रतिक्रिया दिएका छन् ।

अमेरिकी संसदकी सभामुख नेन्सी पेलोसीले भने उक्त फैसलालाई गम्भीर त्रुटी भन्दै विरोध जनाएकी छन् । उनीलगायत डेमोक्र्याट्सले नै अदालतको फैसलामा विरोध जनाएको छ ।

पाकिस्तानमा महिला जिस्क्याएको भन्दै पुरुष पक्राउ

इस्लामाबाद : पाकिस्तानको लाहोरमा महिलाहरुको एक समुहलाई जिस्क्याउँदै यौनिक रुपमा शोषण गरेको आरोपमा एक पुरुषलाई पक्राउ गरेको छ । बिहीबार पीडित युवती र उनका साथीहरुबीच ट्वीटरमा ती व्यक्तिले जिस्क्याएको कुराबारे भएको कुराकानीका आधारमा प्रहरीले पक्राउ गरेको हो ।

पीडित युवती विद्यार्थी हुन् । यस्तै गरी जिस्क्याउने हुँदा सार्वजनिक स्थलमा जान युवतीहरु डराउँछन् भन्दै पीडित युवतीले घटना सार्वजनिक गरेकी थिइन् ।साथीहरुसँगै रिक्स चढेर घर फर्कँदै गरेकी ती युवतीलाई मोटरसाइकलबाट पछ्याउँदै गरेका युवाले जिस्क्याएका थिए ।

हिजबुल्लाहले गर्यो इजरायलको आरोपको प्रतिवाद

लेबनन : हतियार तथा हतियारलाई चाहिने प्रविधि अवैध रुपमा समुद्री बाटो हुँदै लेबननसम्म आयात गर्दैआएको भन्दै हिजबुल्लाहलाई इजरायलले लगाएको आरोप हिजबुल्लाहका नेताले अस्वीकार गरेका छन् ।

संयुक्त राष्ट्रसंघको बैठकमा इजरायली प्रतिनिधिले उठाएको यस्तो मुद्दालाई  हिजबुल्लाहका प्रमुख हसान नसरल्लाहले प्रतिवाद गरेका हुन् । ‘इजरायली प्रतिनिधिले सुरक्षा परिषद्को बैठकमा लगाएको आरोप म पूर्ण रुपमा अस्वीकार गर्छु,’ नसरल्लाहले टेलिभिजनमा अन्तर्वार्ता दिँदै प्रतिवाद गरेका हुन् ।

फिलिपिन्समा लगातार दुई भूकम्प, आठजनाको ज्यान गयो

मनिला : फिलिपिन्सको बातानेस प्रान्तस्थित शनिबार दुई भूकम्प जाँदा ८ जनाको मृत्यु भएको छ । अरु ६० जना घाइते छन् । पहिलो ५.४ र दोस्रो ५.९ म्याग्निच्युडको भूकम्प गएको थियो । जहाँ थुप्रै घाइतेहरु भत्किएका घरमा च्यापिएको बताइएको छ ।

भूकम्पपछि सूनामीको पूर्वसूचना नदिइएकाले थप क्षतिको आंकलन गरिएको छैन । भूकम्प गएको प्रान्त टापुले भरिएको क्षेत्र हो ।

चीनमा पहिरोमा २४ को मृत्यु, २७ बेपत्ता

बेइजिङ : चीनको दक्षिण पश्चिम क्षेत्रस्थित ग्वुइझाओ प्रान्तमा पहिरोका कारण २४ जनाको ज्यान गएको छ । २७ जना हराइरहेका छन् ।

स्थानीय अधिकारीका अनुसार प्रारम्भीक अनुसन्धानका अनुसार पहिरोबाट ७७ जना मानिस प्रभावित भएका छन् । हराइरहेकाहरुको खोजी कार्य अहिले पनि जारी छ ।

गुरुद्वाराका पूजारीमाथि अमेरिकामा दुव्र्यवहार र आक्रमण

वासिङ्टन : गुरुद्वाराका एक पूजारीमाथि अमेरिकाको क्यालिफोर्नियामा दुव्र्यवहार साथै हातपात गरिएको बताइएको छ । अमरजित सिंह नामका पूजारीलाई मास्क लगाएका व्यक्तिहरुले आक्रमण गर्दै आफ्नै देश फर्कन भन्दै हमला गरेका हुन् ।

शिख समुदायका ती पूजारीमाथिको आक्रमणलाई विभेद्को रुपमा मुद्दा उठेको छ । घटनापछि प्रहरीले अनुसन्धान गर्ने जनाएको छ । घटनापछि पीडित अमरजित मिडियासामु आएर सार्वजनिक गरेका हुन् ।

हङकङमा हजारौं प्रदर्शनकारी सडकमा

हङकङ : हङकङमा केही हप्तादेखि नै जारी प्रदर्शन शनिबार झन चर्किएको छ । प्रहरीले शनिबारको प्रदर्शनमा प्रतिबन्ध लगाए पनि ‘प्रजातन्त्रवादी प्रदर्शनकारी’हरु सडकमा उत्रिएका हुन् ।

हजारौंको संख्यामा उनीहरु यूएन लङ सहरमा प्रदर्शन गरिरहेका छन् । प्रदर्शनकारीले प्रहरीविरुद्ध नारावाजी गरेका छन् । प्रदर्शनको क्रममा घुसपैठ गरी आक्रमण गर्ने समुहलाई प्रहरीले बेवास्ता गरेको भन्दै त्यसविरुद्ध उनीहरु आक्रामक बनेका छन् ।

हङकङमा एउटा सुपुर्दगी विधेयकको विरोधसँगै सुरु भएको प्रदर्शन केही हप्तादेखि चल्दैआएको छ ।