वासिङटन : अमेरिकी प्रसिद्ध प्रविधि कम्पनी एप्पललाई ‘म्याक प्रो डेस्क टप कम्प्यूटर’ को उत्पादन अमेरिकामै नगरे एप्पलको उक्त उत्पादनमा छुट नदिने अमेरिकी राष्ट्रपति डोनल्ड ट्रम्पले चेतावनी दिएका छन्।
राष्ट्रपति ट्रम्पले ट्विट गर्दै भने, ‘यदि एप्पलले चीनमा बनाएका ‘म्याक प्रो’ को सामानमा छुट मागेमा उसमाथि लाग्ने सेवा शुल्कमा कुनै छुट दिइनेछैन। त्यो छुट र सेवा पाउनको लागि एप्पलका लागि प्रयोग गरिने सामानको उत्पादन अमेरिकामै हुनुपर्छ।’
अमेरिकी राष्ट्रपतिले एप्पललाई म्याक प्रोको पार्ट्स चीनमा बनाएमा आयातमा कुनै पनि छुट नदिइने र नमाने परिणाम आयातमा बन्देज लगाउने चेतावनी दिएका हुन्।
चीन र अमेरिकाबीच गत वर्षदेखि चलेको व्यापार विवादका कारण कतिपय बहुराष्ट्रिय कम्पनीको कारोबारमा समस्या हुने गरेको छ। तर गत महिना जापानमा अमेरिकी राष्ट्रपति ट्रम्प र चीनका राष्ट्रपति सी चिनफिङबीच वार्तापछि व्यापार विवादलाई अन्त्य गर्न यस अघि जारी रहेको चिनियाँ तथा अमेरिकी प्रतिनिधिमण्डलको वार्तालाई निरन्तरता दिने सहमति भएको थियो। –रासस/एएफपी
प्रतिक्रिया दिनुहोस !
