अरबी शासककाे डिभाेर्स मुद्दा, माेदीकाे भिडियाे विवाद हुँदै पाकिस्तानमा धर्म परिवर्तनसम्म !

पत्नी हत्याका अभियुक्त पूर्वमेयरलाई फाँसीको सजाय

तेहरान : इरानको राजधानी तेहरानका पूर्व मेयर मोहम्मद अली नजाफीलाई आफ्नै पत्नीको हत्या अभियोगमा फाँसीको सजाय सुनाइएको छ । मंगलबार न्यायापालिकाले यसबारे जानकारी गराएको हो ।

स्थानीय मिडियाका अनुसार गत मे २८ मा नजाफीले आफ्नी दोस्रो पत्नी मित्रा ओस्तादलाई तेहरानस्थित घरमै हत्या गरेका थिए । हत्यापछि पत्नीको शव बाथटबमा भेटिएको थियो । जब कि, ६७ वर्षे नजाफीले आफ्नो अपराध स्वीकार गरेका थिए ।

पाकिस्तानी प्रधानमन्त्री भन्छन् : जबर्जस्ती धर्म परिवर्तन गराउने गैर–इस्लामिक

इस्लामाबाद : पाकिस्तानी प्रधानमन्त्री इमरान खानले जबर्जस्ती धर्म परिवर्तन गराउनेप्रति लक्षित गर्दै उनीहरुलाई गैर–इस्लामिकको संज्ञा दिएका छन् । उनले भनेका छन्, ‘यस काममा जो लिप्त छ, उसले मुस्लिम इतिहास जानेकै छैन ।’ सोमबार राष्ट्रिय अल्पसंख्यक दिवसको अवसरमा इमरानले धर्म परिवर्तन जस्तो काम कसैले पनि हातमा लिन नसक्ने बताए ।

गैर मुस्लिम महिलासँग विवाह गरेर वा धम्की दिएर धर्म परिवर्तन गराउने काम गैर धार्मिक रहेको उनले बताए । पाकिस्तानमा पछिल्लो समय जबर्जस्ती धर्म परिवर्तन हुने गरेको भन्दै उनले यसमा आलोचना गरेका थिए ।

५ सय भन्दा बढी भारतीय एकैचोटी पाकिस्तान प्रवेश

इस्लामाबाद : गुरु नानकको जन्मदिन मनाउन भारतबाट ५ सय भन्दा धेरै शिख समुदायका भारतीय एकैचोटी पाकिस्तान गएका छन् । शिख समुदायका आदर्श मानिने गुरु नानकको ५५०औं जन्मजयन्ति मनाउन उनीहरुले पाकिस्तानमा प्रवेश पाएका हुन् । पाकिस्तान सरकारले ती तिर्थयात्रीलाई वाघा बोर्डरबाट मंगलबार बिहान प्रवेश दिएको जनाएको छ ।

दुश्मनी साँध्दैआएका भारत र पाकिस्तानबीच हालैको एक भ्रमणले सम्बन्धको नयाँ आयाम पुष्टि गरेको छ । पाकिस्तानमा पनि गुरु नानकका अनुयायी रहँदैआएका छन् ।

इथियोपियामा एकै दिन ३५ करोड ३६ लाख ६ सय ६० वटा रुख रोपियो

इथियोपिया : इथियोपियन नागरिकहरुले ३५ करोड भन्दा धेरै रुख एकैपटक रोपेका छन् । सोमबार १२ घण्टाको अवधिमै उनीहरुले ३५ करोड ३६ लाख ३३ हजार ६ सय ६० वटा रुख रोपेका हुन् । वन फणानी तथा जलवायु परिवर्तनको असरबाट बच्न यहाँ एक अभियान नै सञ्चालन गरी ठूलो मात्रामा वृक्षरोपण गरिएको हो ।

अरबी शासकको डिभोर्स मुद्दा लण्डनमा फैसला हुँदै

लण्डन : दुबइका शासक शेख मोहम्मद अल माक्तोम र उनकी पूर्वपत्नी हाया बिन्त अल हुसेनको मुद्दा बेलायतको लण्डनमा फैसला हुँदैछ । यसका लागि जुलाइ ३० मा उनीहरु लण्डनस्थित उच्च अदालतमा उपस्थित भएका छन् । हाया दुबइबाट भागेपछि पहिलोपटक सार्वजनिक रुपमा यसरी अदालतमा उपस्थित भएकी हुन् । अदालतमा उपस्थित हुन उनी वकिलको टोलीसँगै आएकी थिइन् ।

यही महिना हाया आफ्ना पतिसँग सम्बन्ध तोड्दै छोरीको साथ भागेर जर्मनी पुगेकी थिइन् । उनी पछिल्लो समय लण्डनमा लुक्दैआएको मिडियाले जनाएका थिए । दुबइका शासक शेखले पूर्वपत्नीविरुद्ध लण्डनमा मुद्दा दायर गरेपछि यसबारे फैसला हुन लागेको हो । ७० वर्षीय शासकले ४५ वर्षीया हायालाई छैटौँ श्रीमतीको रुपमा २००४ मा विवाह गरेका थिए ।

मलेसियामा राजा सुल्तानको राज्यभिषेक

क्वालालाम्पुर ः मलेसियामा सुल्तान अब्दुल्लाह सुल्तान अहमद साहले मंगलबार औपचारिक रुपमा नयाँ राजाको रुपमा राज्यभिषेक ग्रहण गरेका छन् । सुल्तानले राष्ट्रव्यापी सम्बोधन गर्दै जनताको हितलाई प्राथमिकता दिने र वहुजातीय, वहुधार्मिक लगायत विभिन्न समुहबीच एकताको पक्षमा आग्रह गरेका छन् ।

जनतालाई सधैँ पहिलो स्थानमा राख्ने भन्दै आफ्नो प्रयास गरिबी न्युनिकरण गर्न केन्द्रित हुने उनले बताएका छन् । सुल्तानले राजाको रुपमा गत वर्षमै पदभार ग्रहण गरे पनि अहिले विधिवत रुपमा सांस्कृतिक मान्यता पाएका हुन् ।

मोदीको ‘डिस्कभरी भिडियो’लाई पुलवामा आक्रमणसँग जोडेर आलोचना

नयाँदिल्ली : विश्वकै चर्चित डिस्कभरी च्यानलमा ‘म्यान भर्सेस वाइल्ड’मा भारतका प्रधानमन्त्री नरेन्द्र मोदी देखिने भएपछि उनको चौतर्फी आलोचना भएको छ ।कार्यक्रमको प्रचारात्मक भिडियोमा सञ्चालक बियर ग्रिल्ससँगै मोदी देखिएपछि सामाजिक सञ्जालमा मोदीविरुद्ध ह्यासट्याग अभियान नै सुरु भएको छ ।

पुलवामा हमला भएकै बेला मोदी भने डिस्कभरीका लागि सूटिङमा व्यस्त रहेको भन्दै मोदीविरुद्ध #PMmodiondiscovery अभियान सुरु भएको हो ।