उदयपुर : जिल्ला प्रहरी कार्यालय उदयपुरले १० दिनमा ७ जना फरार प्रतिवादीलाई पक्राउ गरेको छ ।
घटना लगत्तै फरार भएका र मुद्दा फैसलापछि कैद भुक्तान नगरी फरार रहेका प्रतिवादीलाई प्रहरीले पक्राउ गरेको हो । प्रहरीले फरार प्रतिवादी पक्राउ अभियान सञ्चालन गरेपछि प्रतिवादीहरु धमाधम पक्राउ पर्न थालेको जिल्ला प्रहरी कार्यालय उदयपुरका प्रहरी प्रमुख एसपी वीरबहादुर बुढामगरले जानकारी दिए ।
उनका अनुसार ०७६ असार ४ गते १४ वर्षीया बालिकालाई बलात्कारपछि फरार रहेका त्रियुगा नगरपालिका–८ बोकेढीकका २० वर्षीय सञ्जय राउत शनिबार दिउँसो त्रिनपा ११ संगमटोलबाट पक्राउ परेका छन् ।
यस्तै ०७५ मंसिर २१ गते सप्तरीको साविक पिप्रापश्चिम गाबिस ९ का ३५ वर्षीया किसनवती यादवलाई गोली हानी हत्या गरेर फरार रहेका सोही ठाउँका ६० वर्षीय खुलाल मगरलाई प्रहरीले शुक्रबार साँझ पक्राउ गरेको छ ।
सिकार खेल्ने क्रममा उदयपुरको त्रिनपा ५ खारखोला जंगलमा मगरले घाँस काटन गएकी यादवलाई भरुवा बन्दुकबाट गोली हानी हत्या गरी शव जलाएर फरार भएका थिए ।
फरार प्रतिबादीलाई शुक्रबार इलाका प्रहरी कार्यालय भेडिया सप्तरीसँग समन्वय गरी घरबाट पक्राउ गरिएको एसपी मगरले बताए । घटनासँगै रहेका अर्का सोही ठाउँका खड्गबहादुर मगर हालसम्म फरार छन् ।
१५ वर्षीया बालिकालाई बलात्कार गरी फरार रहेको आरोपमा उदयपुरगढी गाउँपालिका ५ मौवासेका ६१ वर्षीय कृष्णबहादुर दर्जीलाई पनि प्रहरीले शुक्रबार पक्राउ गरेको छ ।
०७६ असार १४ गते बलात्कार गरी फरार रहेका आरोपितलाई प्रहरी निरीक्षक ज्ञानबहादुर माझीको नेतृत्वमा गएको टोलीले पक्राउ गरेको हो । १२ वर्षीया बालिका बलात्कारपछि फरार रहेका त्रियुगा नगरपालिका १५ वेतेनीका ५१ वर्षीय कृष्णबहादुर मगरलाई पनि बिहीबार जिल्ला प्रहरी कार्यालयबाट खटिएको टोलीले पक्राउ गरेको छ ।
०७६ असार ५ गते राति १० बजे बलात्कार गरी फरार रहेका प्रतिबादीलाई प्रहरीले राति १० बजे सोही वडाको रानीबासबाट पक्राउ गरेको हो । यस्तै चोरी अभियोगमा ३२ वर्षीय भारतीय नागरिक मोतिहारी जिल्ला झारौखर थाना, विजावनी पञ्चायत–११ अठमोहानका सुरेश साहलाई पनि प्रहरीले पक्राउ गरेको हो ।
साहले भारतीय नागरिक जावेद आलम, भाग अन्सारी, अंगेश कुमार, नइम आलम, भोला सहनी, संजय सहनी, फर्याज आलमको सहयोगमा पसल फुटाएर ३९ लाख ८३ हजार १ सय ५३ रुपैँया मुल्य बराबरको मोबाइल चोरी गरेको आरोप छ । अन्य आरोपित अझै फरार छन् ।
हत्या अभियोगका फरार अभियुक्त ३५ वर्षीय मोहन बुढाथोकी, ३३ वर्षीय होमबादुर कार्की, लागुऔषध अभियोगका २३ वर्षीय मिलन खतिवडालाई पनि प्रहरीले पक्राउ गरेको छ ।
प्रतिक्रिया दिनुहोस !
