कश्मीरी महिला-बालबालिकाको चिन्तादेखि केन्याको संसदसम्म
रुसको सैनिक क्याम्पमा विस्फोट हुँदा २ को मृत्यु
मस्को : रुसको उत्तरी क्षेत्रस्थित एक सैनिक क्याम्पमा रकेट इन्जिन विस्फोट हुँदा दुईजनाको ज्यान गएको छ । अरु ६ जना घाइते छन् । रक्षा मन्त्रालयले बिहीबार विज्ञप्ति मार्फत् यस्तो जानकारी गराएको हो । घाइतेलाई अस्पताल लगिएको छ ।
पाकिस्तानी पूर्वप्रधानमन्त्री नवाज सरिफकी छोरी पक्राउ परिन्
इस्लामाबाद : पाकिस्तानी पूर्वप्रधानमन्त्री नवाज सरिफकी छोरी तथा मुस्लिम लिगकी उपाध्यक्ष मरियम सरिफ पक्राउ परेकी छन् । ‘नेश्नल एकाउन्टेबिलिटी ब्यूरो’का अनुसार बिहीबार उनी जेलमा रहेका आफ्ना बावुलाई भेटेर फर्कने बेला पक्राउ परेकी हुन् ।
पाकिस्तानमा ठूलो मानिएको चौधरी सुगर मिल्स मुद्दामा मरियम पनि संलग्न रहेको भन्दै उनीमाथि मुद्दा थियो । उनी अहिले हिरासतमै रहेको स्थानीय मिडियाले जनाएका छन् ।
कश्मीरी महिला र बालबालिकाबारे मलालाको चिन्ता
इस्लामाबाद : नोबेल पुरस्कार विजेता तथा पाकिस्तानी अभियन्ता मलाला युसफ्जाइले कश्मीरका महिला तथा बालबालिकाबारे चिन्ता व्यक्त गरेकी छन् । भारत सरकारले कश्मीरको स्वायत्तता खारेज गरेपछि त्यहाँका महिला र बालबालिकाको सुरक्षामा मलालाले चिन्ता व्यक्त गरेकी हुन् ।
‘म बच्चा भएदेखि नै, मेरी आमा र बा बच्चा भएदेखि नै, मेरा हजुरबा युवा हुँदादेखि नै कश्मीरका जनता द्वन्द्वमा बाँच्दैआएका छन्,’ मलालाले आफ्नो ट्वीटमा लेखेकी हुन् ।
२२ वर्षीया मलालाले यस क्षेत्रमा शान्ति स्थापनाका लागि अन्तर्राष्ट्रिय समुदायसँग आग्रह समेत गरेकी छन् । उनले लेखेकी छन्, ‘म आज कश्मीरी महिला र बालबालिकाको सुरक्षाबारे चिन्तित भएको छु ।’
पाकिस्तानले रोक्यो भारत जाने यात्रुवाहक रेल
इस्लामाबाद : कश्मीर मामिलासँगै भारतसँग रुष्ट भएको पाकिस्तानले भारत जाने रेल ‘सम्झौता एक्सप्रेस’ बन्द गरिदिएको छ । सम्झौता एक्सप्रेसका यात्रुहरु बिहीबार घण्टौँसम्म वाघा बोर्डरमै रोकिनुपरेको छ ।
बिहीबार पाकिस्तानी रेलमन्त्री शेख रसिदले सम्झौता एक्सप्रेस रोक्ने कुरा पत्रकार सम्मेलन गरी जानकारी गराए । बिहीबार १ बजे उक्त रेल वाघा बोर्डरमा पुगेर अब अघि नबढ्ने बताइएको हो । साथै पाकिस्तानी पक्षबाट अब भारतीय सुरक्षाकर्मी नै आएर भारतीय भूमिमा रेल जानुपर्ने शर्त राखिएको छ ।
अल्पसंख्यक याजिदी महिला र बालबालिकालाई फ्रान्समा शरण मिल्यो
पेरिस : फ्रान्सले अल्पसंख्यक इराकी याजिदी महिला र बालबालिकको समूहलाई एकैचोटि शरण दिएको छ । यहाँको आन्तरिक तथा विदेश मन्त्रीहरुका अनुसार यस्तो समुदायका ३१ परिवारलाई बिहीबार बसोबासको व्यवस्था मिलाइएको हो ।
गत डिसेम्बर र मे महिनामा पनि १६ र २८ परिवारलाई फ्रान्सेली सरकारले स्थायी बसोबासको प्रबन्ध मिलाएको थियो । याजिदी विश्वमै धार्मिक अल्पसंख्यक मानिएको मुस्लिम समुदाय हो ।
हजका लागि एक लाख बढी जनावर मासुका लागि तयार
दोहा : मुस्लिम समुदायको महत्वपूर्ण चाड हजको सन्दर्भमा साउदीमा १ लाख भन्दा धेरै जनावर मासुका लागि तयार पारिएका छन् । लाखौंँको संख्यामा हज तिर्थयात्रीहरु उपस्थित भइसकेको पनि साउदी अधिकारीले जनाएका छन् । सुरक्षाको लागि ४० हजार भन्दा धेरै सुरक्षाकर्मी, प्राविधिक लगायत खटाइएको छ ।
केन्यामा महिला सांसदले बच्चा च्यापेरै संसद बैठक पुगिन्
केन्या : बुधबार केन्याको संसदमा एक चाखलाग्दो र अनौठो घटना भयो । जुलेखा हसन नामकी एक महिला सांसदका कारण यहाँको तल्लो सदनमा खैलाबैला मच्चियो ।
१५ मिनेटसम्म त संसद बैठक नै अवरुद्ध भयो । हसनले जब ५ महिनाको छोरालाई काखमा च्यापेर संसद बैठकमै पुगिन् त्यसपछि अन्य थुप्रै सांसदले विरोध जनाए ।सोमालियासँगको सीमा विवादबारे बहस भइरहँदा हसनले बच्चालाई लिएरै बैठकमा पुगेकी थिइन् । तीन सन्तानकी आमा हसनले भने आफ्नो सन्तानलाई हेरचाह गर्ने अर्को कुनै उपाय नभएकाले यसरी संसदमै ल्याउनु परेको प्रतिक्रिया दिएकी छन् ।
साथै काम पनि छाड्न नचाहने र सन्तानको जिम्मा पनि आफूले व्यहोर्नुपरेकाले यस्तो भएको उनको भनाइ थियो । सभामुख क्रिस्टोफर ओमुलेलेले भने उनलाई सन्तानसहित बैठकमा सहभागी हुन नसक्ने भन्दै बाहिर पठाए । संसद भवन बच्चालाई हेरचाह गर्ने ठाउँ नभएको उनको तर्क थियो । हसनले संसद बैठक छाडेसँगै संसदमा बहसकै रुप लिएको थियो । केही सांसदले त ती सांसदलाई वहिस्कार गर्नुपर्ने भन्दै नारावाजी नै गरेका थिए ।