लोकप्रिय बन्दै टेकबल, जहाँ महिला र पुरुष सँगै प्रतिष्पर्धा गर्न सक्छन्
काठमाडौं : २०० बिसीदेखि नै खेल्न सुरु भएको फुटबलका अनेक नयाँ नियम र तरिका पहिचान हुँदै छन् ।
फुटसल र बिच फुटबल त अहिले प्रचलित खेल नै हुन् । पछिल्लो केही वर्षयता टेकबलको आकर्षण बढ्न थालेको छ । हंगेरीमा पहिचान भएको यो खेल फुटबलकै विकसित रुप हो । बीचमा काठको बोर्ड राखेर दुई वा चारजना खेलाडी यसमा खेल्न सक्छन् ।
पूर्व फुटबलर गाबोर बोर्सानीले हंगेरीको बुडापेस्टबाट यो खेललाई पहिलो पटक संसारभर चिनाएका थिए । सन् २०१७ मा त हंगेरीमा टेकबलको अन्तर्राष्ट्रिय प्रतिष्पर्धा नै गराइयो । जहाँ २० जना मात्रै सहभागी थिए ।
गाबोरले २०१४ देखि नै यो खेललाई अभ्यासमा ल्याइसकेका भए पनि प्रारम्भीक चरणमा यो खेल खेल्ने न्युन मात्रै थिए । पछिल्लो समय व्यवसायीक खेलाडी समेत यस खेलमा आकर्षित भएका छन् ।
रोनाल्डिनो टेकबलका एडिक्ट
कुनै बेलामा ब्राजिलियन टीमका स्टार खेलाडी रोनाल्डिनो त टेकबलका पारखी नै हुन् । प्रायः उनी यही खेलमा रमाइरहेका हुन्छन् । यसबारे उनले सिएनएनलाई अन्तर्वार्ता समेत दिइसकेका छन् । ३९ वर्षे यी पूर्व फुटबलर अचेल टेकबलमा नै हरेक समय टेकबलमै रमाइरहेका हुन्छन् ।
महिला र पुरुष दुबै खेल्न मिल्ने
टेकबलको रोचक र सकारात्मक पक्ष के छ भने महिला र पुरुष दुबै सँगै खेल्न मिल्छ । महिला फुटबलको प्रचार र महत्व कम आंकलन भएको भन्दै बहस भइरहँदा टेकबलमा महिला पनि पुरुषसँगै प्रतिष्पर्धा गर्न सक्छन् । कतिपय खेलमा त महिला खेलाडी पुरुषसँग प्रतिष्पर्धामा खरो उत्रिसकेका छन् । यसबारे जानकारहरुका अनुसार नयाँ भए पनि निकै रमाइलो र छरितो छ यो खेल ।