ओखलढुंगा : ओखलढुंगामा श्रावण महिनामा बलात्कार आरोपमा पक्राउ पर्नेमा प्रहरीदेखि ६५ वर्षीय वृद्ध समेत छन् । साउनयता बलात्कार अभियोगमा प्रहरीले तीन व्यक्तिलाई पक्राउ गरेको छ । किशोरी बलात्कार गरेको आरोपमा एकसाता अघि एक प्रहरी जवान पक्राउ परे । प्रहरी चौकी श्रीचौरमा कार्यरत प्रहरी जवान प्रकाशकुमार यादव जवरजस्ती करणी मुद्दामा पक्राउ परेका हुन् । यादवले जवरजस्ती करणी गरिरहेका बेला किशोरीका बाबुले फेला पारेपछि घटना बाहिर आएको थियो ।
यादवले यसअघि जङ्गलमै घाँस काट्न गएको समयमा साउन २ गते पनि किशोरीलाई बलात्कार गरेको खुलेको छ । आरोपित यादवलाई पक्राउ गरी कारबाही प्रक्रिाया अघि बढिसकेको जिल्ला प्रहरी कार्यालयका प्रमुख प्रहरी नायब उपरीक्षक पुष्पराज मल्लले बताए ।
१० वर्षीया बालिकालाई बलात्कार गरेको आरोपमा ६५ वर्षीय वृद्ध पक्राउ परेका छन् । चिशंखुगढी गाउँपालिका–६ भदौरेका अम्बरबहादुर मगर पक्राउ परेका हुन् । घरमा कोही नभएका बेला मगरले बालिकालाई करणी गरेको भन्दै बालिकाका आफन्तले दिएको किटानी जाहेरीका आधारमा प्रहरीले उनलाई पक्राउ गरेको छ । मगरले बालिकालाई प्रलोभनमा पारेर शौचालयमा लगेर करणी गरेको प्रहरीले जनाएको छ ।
साउन १ गते एक ३२ वर्षीया महिलालाई बलात्कार गर्न खोजेको आरोपमा लिखु गाउँपालिका–८ का २७ वर्षीय विक्रम विष्टलाई पक्राउ गरिएको प्रहरीले जनाएको छ । रातको समयमा पीडित महिलाको घरको ढोका फोडेर घरभित्र पस्न खोज्दा महिलाले होहल्ला गरी प्रतिकार गर्दा बलात्कृत हुनबाट जोगिएको उजुरीका आधारमा विष्ट पक्राउ परेको प्रहरीको भनाई छ । पक्राउ परेका तीनै जनालाई म्याद थप गरी हिरासतमा राखेर अनुसन्धान भइरहेको प्रहरीले जनाएको छ ।
प्रतिक्रिया दिनुहोस !
