ओखलढुंगा : तीन दिनदेखि मौसममा आएको खराबीले उडान नहुँदा लुक्लामा तीन सय बढी विदेशी पर्यटक अलपत्र परेका छन् । लगातारको वर्षा र हुस्सुका कारण उडान हुन नसक्दा पर्यटक अलपत्र परेको नागरिक उड्डयन प्राधिकरण लुक्ला कार्यालयका प्रमुख इमानाथ अधिकारीले बताए ।
उनका अनुसार लुक्लामा अहिले पनि पानी परिरहेको छ । सगरमाथा बेश क्याम्पबाट काठमाडौं फर्किन लागेका ३ सय बढी पर्यटक उडान अवरुद्ध भएपछि ३ सय जति विदेशी लुक्लामै रहेको अधिकारीले जानकारी दिए । उनले भने, 'विदेशी तथा नेपाली समेत गरी लुक्लामा ४ सय जना जति रोकिएका छन् ।' मंगलबार सुर्केबाट पर्यटक बोकेर उडेका हेलिकप्टर खराब मौसमका कारण सिन्धुली, रामेछाप र काभ्रेमा अवतरण भएका थिए ।
लुक्लाबाट तीन दिनदेखि उडान हुन सकेको छैन। लुक्लाबाट डेढ घण्टा तल रहेको सुर्केतमा समेत वर्षाका कारण उडान हुन सकेको छैन। मौसम नखुलेपछि एउटा हेलिकप्टर लुक्लामै रहेको छ ।
लेक लागेर एकको मृत्यु
मेरापिक क्षेत्र भ्रमणमा आएका एकजना पर्यटकको लेक लागेर मृत्यु भएको छ । मृत्यु हुनेमा भारतीय मूलका ३३ वर्षीय गोविन्द लखमान रहेको सोलुखुम्बु प्रहरीले पुष्टि गरेको छ । करिब ४ हजार २ सय मिटरको उचाइमा लेक लागेर ती पर्यटकको मंलबार मृत्यु भएको जिल्ला प्रहरी कार्यालय सोलुखुम्बुका प्रहरी नायब उपरीक्षक नारायणप्रसाद चिमोरियाले जानकारी दिए ।
यसैबीच लेक लागेर बिरामी परेका आठजनाको उद्धार गरिएको छ । बिरामी भई अलपत्र परेका ७ विदेशी र एक नेपालीसहित ८ जनाको भने उद्धार गरिएको हो । उद्धारपछि उनीहरुलाई कैलाश र डाइनेष्टि एयरका हेलिकप्टरमार्फत काठमाडौं लगिएको छ ।
प्रतिक्रिया दिनुहोस !
