दिल्लीमा राजदूत आचार्यले गरे संविधानको प्रशंसा, तर आएनन् अजित डोभल !

नयाँ दिल्ली : भारतका लागि नेपाली राजदूत नीलाम्बर आचार्यले नेपालको संविधान सामाजिक न्यायमा आधारित समावेशी रहेको बताएका छन् ।

नेपालको चौथो संविधान दिवस र राष्ट्रिय दिवसका अवसरमा नयाँ दिल्लीको ‘ला मेरिडियन’ होटलमा आमन्त्रित अतिथिहरुलाई सम्बोधन गर्दै आचार्यले यस्तो बताएका हुन् ।

‘समावेशी संविधानले सामाजिक न्यायमा आधारित समावेशी राजनीतिका लागि मजबुत आधार तयार पारेको छ । यसले लोकतान्त्रिक शासनका सबै मूलभुत मुल्य र मान्यतालाई समेटेको छ,’ आचार्यले भने ।

भारतीय विदेश राज्य मन्त्री वी. मुरलीधरण सहित भारतीय राजनीतिक दलका नेताहरु समेत कार्यक्रममा सहभागी थिए । साथै प्रवासी नेपालीको सक्रिय सहभागिता थियो । आचार्यले भने, ‘संघीय संसदका लागि मिश्रित चुनावी प्रणालीले महिलाको साथै नेपालका विविध समाजका विभिन्न समुदायको प्रतिनिधित्वलाई सुनिश्चित गराएको छ ।’

पञ्चशीलको सिद्धान्तमा आधारित असंलग्न परराष्ट्र नीतिलाई नेपालले अंगीकार गरेको भन्दै आचार्यले अन्तर्राष्ट्रिय कानुन र सर्वभौमिक मापदण्डमा आधारित नेपालको विदेश नीति स्वतन्त्र रहेको उल्लेख गरे ।

कार्यक्रममा आचार्यले भने, ‘हाम्रो विश्वका सबै मित्र राष्ट्रहरुसँग राम्रो सम्बन्ध छ भने छिमेकीहरुसँग घनिष्ट सम्बन्ध छ ।’ उनले नेपाल–भारत सम्बन्धको व्यापकता र बहुआयामिक प्रकृति बारे प्रशंसा गरेका थिए ।

राजदूत आचार्यले शुक्रबार बिहान दूतावास प्रांगणमा नेपालको राष्ट्रिय झण्डा फहराउँदै प्रवासी नेपालीहरुसँग शुभकामना आदान प्रदान गर्दै अनौपचारिक छलफल समेत गरेका थिए ।

आएनन् अजित डोभल

संविधान दिवसको कार्यक्रममा नेपाली दूतावासले भारतका राष्ट्रिय सुरक्षा सल्लाहकार अजित डोभललाई समेत विशेष आमन्त्रण गरेको थियो । ७ बजेदेखि सुरु भएको कार्यक्रममा ७ देखि सवा ७ बजेसम्म सहभागी हुने भनेर डोभलको निजी सचिवालयले दूतावासलाई जानकारी गरायो ।

तर डोभल सहभागी भएनन् । अन्तिम समयमा डोभलको कार्यक्रम किन रद्द भयो भन्नेबारे दूतावासलाई पनि जानकारी आएन । नेपालमा संविधान जारी गर्ने बेलामै भारतीय नाकाबन्दीकै योजनाकारमध्ये डोभल एक नेता मानिन्छन् ।