काठमाडौं : कागेश्वरी मनोहरा नगरपालिका -५ थलीमा आगलागी हुँदा एक घर जलेर नष्ट भएको छ । शनिबार राति ८ बजेतिर थलीस्थित जीतबहादुर आचार्यको टीनले छाएको ४ कोठे घर जलेर नष्ट भएको हो।
आचार्यले ३ लाख नगद, ७ तोला सुनसहित भाडाकुँडा, लत्ताकपडालगायत घरमा रहेको सबै सामान जलेर नष्ट भएको जानकारी दिए ।
भान्सामा खाना बसालेर आफू अर्को कोठामा गएको बेला छिमेकीले आगो लागेको जानकारी गराएपछि मात्रै आचार्यकी श्रीमती विन्दाले आगो लागेको थाहा भएको बताइन् । आगलागि हुँदा घरमा राखिएका २ वटा ग्यास सिलिन्डरसकेत पड्किए।
घरभित्र उनका १० वर्षीय छोरा र बिरामी भाई बुहारी रहेका थिए। उनीहरुपनि बाहिर आगो लागेको थाहा पाएपछि भागेर बाँचेको आचार्यले बताइन् । 'बाहिर आउँदा भान्सामा खाना पाकिरहेको छ, कसरी आगो लाग्यो, सिलिन्डरपनि पछिमात्रै पड्किएका हुन् ।' उनले भनिन्, ' मानवीय क्षति त हुन पाएन तर सबै सम्पति नष्ट भयो।'
आगो निभाउन दमकल पुगेपनि घटनास्थलमा जाने बाटो नभएपछि स्थानीय र प्रहरीको सहायतामा आगो नियन्त्रणमा लिइएको हो । उनीहरु राति छिमेकीको घरमा गएर बसेका छन्।
सिन्धुपाल्चोक स्थायी घर भएका आचार्यको थलीमा सानो कपडा पसल रहेको छ । उनी कहिलेकाहिँ भाँडा बोकेर बजारमा बेच्ने कामसमेत गर्दै आएका छन् । कपडा पसलमा रहेका जीतबहादुरलाई छिमेकीले घरमा तुरुन्त आउन भनेपछि उनी घरमा आएका थिए । आचार्य भन्छन्,'अस्पतालबाट बिहानमात्रै बिरामी बुहारी घरमा ल्याएकाले केही भयो कि भनेर कुद्दै आएँ, आउँदा घर जलेर नष्ट भएको रहेछ।'
प्रतिक्रिया दिनुहोस !
