विराटनगर : प्रदेश १ का प्रदेश प्रमुख सोमनाथ अधिकारी (प्यासी)ले बुधबार साँझ पदभार ग्रहण गरेका छन् । काठमाडौंबाट बुधबार साँझ विराटनगर विमानस्थल ओर्लिएलगत्तै प्रदेश प्रमुखको कार्यालयमा पुगेर उनले स्वस्ती वाचन र सेनाको सलामीपछि पदभार ग्रहण गरेका हुन् ।
बुधबार दिउँसो पदभार ग्रहण गर्ने तयारी भएपनि विमान डिलेका कारण साँझमा मात्रै अधिकारी विराटनगर आइपुगेका थिए । प्रदेश प्रमुख अधिकारी मंगलबार काठमाडौंमा शपथग्रहण गरी बुधबार विराटनगर आएका हुन् । उनलाई विराटनगर विमानस्थलमा साँझ प्रदेश सरकारका मन्त्रीहरूले स्वागत गरेका थिए ।
पदभार ग्रहण गर्दै प्रदेश प्रमुख अधिकारीले आफ्नो पदलाई तडकभडक रहित बनाउने बताएका छन् । 'प्रदेशका राजनीतिक दल, सामाजिक सांस्कृतिक आयाम, यहाँका आर्थिक र शैक्षिक क्षेत्रको अवस्था आदिको बारेमा जानकारी लिएर व्यवस्थितरूपमा आफ्नो कामलाई अघि बढाउनेछु, तडकभडक काम छैन,' उनले भने ।
आफ्नो कार्यकालमा संविधान र कानुनअनुसार भएका निर्णयहरु कार्यान्वयन गर्ने र सोही अनुसार निर्देशनको भूमिका निर्वाह गर्ने उनले बताए । प्रदेश १ का प्रमुखमा नियुक्त अधिकारी कास्की पोखराका पुराना कम्युनिस्ट नेता हुन् । २०४८ सालको आम निर्वाचनमा कास्की ३ सांसद रहेका अधिकारी २०५१ को मध्यावधि र २०५६ को आम निर्वाचनमा उम्मेदवार भएपनि पराजित भएका थिए ।
प्रतिक्रिया दिनुहोस !
