१२ वर्षमा आमा बन्दै कमला
![१२ वर्षमा आमा बन्दै कमला](https://annapurnapost.prixacdn.net/media/albums/pregnancy_20191108113300_U5ehuYDjQn.jpg)
काठमाडौं : ११, १२ वर्षे उमेर यता दौड्यौ, उता कुद्यो । घरी झुम्राको पुतली बनाएर खेल्थिन् त घरी आमासँग खेतबारीमा काम गर्न पुग्थिन् कमला बोहोरा । जिन्दगी ठिकठाक नै थियो । उनका बाबा-आमा दुवै बौद्धिक अपाङ्ग छन् । कतिबेला के गर्ने मेसो पाउँदैनन् । आमाबुवा जस्तै बौद्धिक अपाङ्ग छिन् उनी पनि ।
अछामकी १२ वर्षीया कमला विगत ४ दिनदेखि प्रसूतीगृह थापाथलीमा भर्ना भएकी छन् । उनको पेटमा ५ महिनाको बच्चा हुर्किरहेको छ । कसले बलात्कार गर्यो ? कसले यातना दियो ? बच्चाको बाबु को हो ? आफ्नो शरीरमा भएको परिवर्तनबारे पुरै बेखवर छिन् । अछामी भाषामा कुरा गर्छिन् । आगन्तुक आउँदा खुसी हुन्छिन् र रमाउँछिन् ।
कमलाको छेवैमा बसेका छन् उनका ठूलोबा । कमलालाई उनैले हेरचाह गर्छन् । सामान्य खेतीपाती गर्ने ठूलोबा कृष्णबहादुर छोरीको स्वास्थ्य अवस्था, मुद्दामामला र काठमाडौंको बसाइले अत्तालिसकेको बताउँछन् । 'म त गाउँमा काम गरिखाने सोझो मान्छे । घरमा खेतीपाती के भयो होला ? आफ्नै स्याहार गर्न नसक्ने भाइ-बुहारीका भरमा घर छाडेर आएको छु’, उनले अत्तालिँदै गुनासो पोखे ।
उनका अनुसार गाउँको वडाकार्यालयले कमलाको उपचारको लागि २० हजार उपलब्ध गराएको थियो । 'काठमाडौं आउँदा एम्बुलेन्सलाई मात्रै १० हजार बुझाएँ । गोजीको पैसा सकिन लाग्यो । चिनेजानेको कोही छैनन् । न माग्ने ठाउँ नै छ', उनले भने।
छोरीले न्याय पाउनुपर्ने बताउँदै उनले भने, 'छोरीको स्वास्थ्य के-कसो हुने हो ? सुस्तमनस्थितिकी बालिकालाई यो अवस्थामा पुर्याउने जो भए पनि सजाय मिलोस्।'
बालिकाको बयानका आधारमा दुई जनालाई प्रहरीले समाएर अनुसन्धान गर्दै छ। बयानकै आधारमा प्रक्राउ परेका पनि १५ वर्षीय बालक हुन् । अहिलेसम्म दोषी पत्ता लागेको छैन । मुद्धा मामला लड्ने मान्छे पनि छैनन् ।
कमलाको स्वास्थ्य अवस्था सामान्य छ । उनलाई जनरल वार्डमा राखिएको छ ।
बालिकाले बच्चा जन्माउने या गर्भपतन गर्ने डाक्टरहरुले निर्णय गरिसकेका छैनन् । पाँच महिना पुगिसकेको बच्चा गर्भपतन गर्न पनि उत्तिकै जोखिम छ । ठुलोबुवा कृष्णबहादुरलाई गर्भपतन गरिदिए हुन्थ्यो भन्ने लाग्छ । उनी भन्छन्, ‘बच्चा जन्माएर हुर्काउन सक्ने अवस्थामै छैन कमला । घरमा पनि बच्चाको स्याहार गर्न सक्ने वातावरण छैन । नसोचेको घटना आइपर्यो । ’
गत महिना कमलालाई कुकुरले टोक्यो । आफन्तले गाउँकै बयलगाडा अस्पतालमा पुर्याए । अस्पतालमा रेविजको सुई लगाइयो । तीनदिन सुई लगाएपछि उनको पेट अस्वाभाविक रुपमा सुन्नियो । स्वास्थ्यकर्मीले किन पेट सुन्नियो भनेर जाँच्दा गर्भवती भएको पत्ता लगाए । उनको पेटमा २१ हप्ताको बच्चा हुर्किरहेको थियो । त्योभन्दा अघि बालिकाले घरमा केही बताएकी थिइनन् । सानो बच्चा भएकाले कसैले यस्तो घटना घटेको होला भनेर शंका गर्ने ठाउँ पनि थिएन।
अस्पतालका अनुसार उनको शरीरको सबै चेक जाँचको रिपोर्ट आइसकेको छैन । लैङिक हिंसा सम्बन्धी घटना भएकाले अस्पतालले बालिकाका सम्पूर्ण उपचार निशुल्क गर्ने जानकारी दिएको छ । (परिवर्तित नाम)
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)