हात्तीले धान नस्ट गर्न थालेपछि नियन्त्रणका लागि प्रशासन गुहार्दै स्थानीय

उदयपुर : धान थन्काउने बेलामा हात्तीले नष्ट गरेपछि उदयपुरको पूर्वी क्षेत्रका स्थानीयले हात्ती नियन्त्रणका लागि प्रशासनको मद्धत मागेका छन्। निकै मेहनत र दुःख गरेर लगाएको धान थन्काउनै लाग्दा हात्तीले खाइदिए पछि किसान चिन्तित हुँदै प्रशासन पुगेका हुन् । कोसी टप्पु वन्य जन्तु आरक्षबाट निस्किएका पाँचवटा हात्तीको समूहले एक महिना यता बेलका नगरपालिका १ र २ को तपेश्वरी, आम्बासी, टप्पु, वानडाँडा क्षेत्रमा किसानले लगाएको धानवालीमा क्षति पुर्‍याएको स्थानीयबासी तथा नगरपालिकाका कार्यपालिका सदस्य विचारी सार्कीले बताए।

हात्तीले पाक्न लागेको धान, घर भत्काएर भित्र राखेको अन्नपात खाइदिने र नष्ट गरिदिने गरेको उनले बताए । उनले भने, ,'दिनभर हात्ती आउँदैनन् जब राती हुन्छ, हुल बाँधेर धानवालीमा प्रवेश गर्छन्, 'राती हात्ती आउने भएपछि मानवीय, भौतिक र अन्नवालीमा क्षती हुन नदिन स्थानीय रातभर जाग्राम बस्दै आएका छन्,' उनले भने, 'घरबाट त जसोतसो लखेटछौ, धानवालीमा सकिन्न ।'

तर्साउनका लागि आगोको राको, घण्टीको प्रयोग गरेपनि अटेर गर्ने गरेको उनको भनाई छ ।     हात्तीले एक महिना यता किसानले १५=२० बिघा क्षेत्रफलमा लगाएको धान खेती नष्ट गरेको स्थानीय तथा पूर्व तपेश्वरी गाविसका अध्यक्ष डिल्ली विमलीले जानकारी दिए । 

उनले आधा दर्जन घर र तीनजनालाई घाइते बनाएको बताए । हात्ती आतंक नियन्त्रण गर्न स्थानीयले नगरपालिका, स्थानीय प्रशासन, डिभिजन वन कार्यालय कोषिटप्पु वन्यजन्तु आरक्षण क्षेत्र र सुरक्षार्थ खटिएका नेपाली सेनासँग आग्रह गरेका छन् । 

स्थानीयले जिल्ला प्रशासन कार्यालय र कोषि टप्पु क्षेत्रको सुरक्षार्थ खटिएको सेनालाई नियन्त्रणका लागि आग्रह गरेका हुन् । नगरपालिकाले भने वन्यजन्तु प्रवेश गर्ने मार्गमा विद्युतीय घेराबारा गरेपनि फरक बाटो प्रयोग गरेका कारण नियन्त्रणमा कठिनाई भएको मेयर दुर्गाकुमार थापाले बताए ।

उनले भने, 'वन्यजन्तु बस्तीमा पसेर क्षति नहोस भनेर तर्साउने गरी विद्युतीय घेराबेरा गरियो तर घेराबेरा छ भनेर जानकारी पाए जस्तै गरी फरक बाटोबाट आउन थाले ।' मेयर थापाले नगरपालिकाको एक्लो प्रयासबाट मात्र सम्भव नभएकाले माथिल्लो निकायलाई अनुरोध गर्ने गरी नगर कार्यपालिकाको बैठकले निर्णय गरिसकेको बताए।