ओखलढुंगा : एभरेष्ट ट्रेल रेसको नवौँ संस्करणका ४३ प्रतिस्पर्धी उछिन्दै नेपाली धावक सुमन कुलुङ बिजेता बनेका छन् । उनले १ सय ७० किलोमिटर दुरी २० घण्टा ५१ मिनेट ३६ सेकेण्डमा पार गरे ।
त्यस्तै स्पेनका गेरार मोरलेसले २३ घण्टा २८ मिनेट २९ सेकेण्डमा निर्धारित दुरी पार गर्दै द्वितीय स्थान हाँसिल गरे । नर्वेका प्रतिस्पर्धी हार्ट सेट्सरोर्डले २३ घण्टा ५४ मिनेट १३ सेकेण्डमा पार गर्दा तृतीय भए ।
बिजेता बनेसँगै सुमनले २ लाख पुरस्कार जितेका छन् । द्वितीय र तृतीयले क्रमशः १ लाख ५० हजार र १ लाख पुरस्कार पाउने भएका छन्। रेस समापन भएपनि पुरस्कार वितरण भने सोमबार मात्रै हुने बताइएको छ । धावकमध्ये सबैभन्दा कम समयमा दुरी पार गरेका कुलुङले दोस्रो पटक एभरेष्ट ट्रेल रेस जितेका हुन् ।
उनी दुई वर्ष पहिलेको रेसमा पनि प्रथम भएको रेसका फिल्ड अर्गनाइजर पासाङनिमा शेर्पाले जानकारी दिए । उनका अनुसार गत सोमाबार सोलुदुधकुण्ड नगरपालिका १०, पत्तालेबाट शुरु भएको रेशमा १३ देशका ४३ धावक सहभागी थिए ।
यो रेश संसारकै १० साहसिक ट्रेल रेस मध्येको एक मानिन्छ । कुलुङसहित नेपालका तीनजना मात्र धावक पासाङ शेर्पा र कृष्णकुमारी भुजेल सहभागी थिए । यसअघि दोलखाको जिरिदेखि रेस आयोजना गरिँदै आएको थियो । जिरिको रुटमा जथाभावी सडक खनिएपछि बाध्य भएर पत्तालेबाट रेस सुरु गरिएको आयोजक संस्था अन्नपूर्ण ट्रेक्स एण्ड एक्सपीडिशन प्रालिका कार्यकारी निर्देशक कामी शेर्पाले बताए । 
अघिल्लो संस्करणमा सहभागी भइसकेका नेपाली धावक सुमन कुलुङले समेत पत्तालेदेखिको रुट थप सहज हुनसक्ने बताए । नेपाल भ्रमण वर्ष २०२० को पूर्वसन्ध्यामा आयोजना भएको यस प्रतियोगिताले नेपाली पर्वतीय पर्यटनलाई विश्वामा चिनाउने आयोजकको विश्वास छ ।
रेसमा नेपाल, स्पेन, अर्जेन्टिना, फ्रान्स, दक्षिण अफ्रिका, मेक्सिको, बेल्जियम, इंल्याण्ड, ब्राजिल, अल्जेरिया, नर्वे, भियतनामलगायत मुलुकका धावक सहभागी छन् । विगतमा यो दौड दोलखा जिल्लाको जिरीबाट सुरु भई रामेछापको बाम्ती भण्डार, सोलुखुम्बु जिल्लाको गोली, पिके, जुनबेसी, टाक्सीन्दु, खरीखोला, लुक्ला, नाम्चे, त्याङबोचे हुँदै पासाङल्हामु गाउँपालिकाको लुक्लामा समापन हुने गरेको थियो ।
के हो ट्रेल रेस ?
यस वर्ष भने नयाँ रुटमा यो रेश सुरु गरियो । ओखलढुंगा जिल्लाको जन्तरधाप, सोलुखुम्बुको पत्ताले हुँदै च्याङ्स्यार, खोर्या, दिम्स्यास, पिके डाँडाको (च्यावीपिके र गोले पिके), लाम्जुरा, जुनबेसी, फुङ्मोचे, तोङ्गीनाशा, टाक्सीन्दु, यावागोन्पा, जुबिङ फेदी, खरीखोला, नाम्चे, खुम्जुङ, फोर्चे, पाङबोचे, त्याङबोचे हुँदै कूल १ सय ७० किलोमिटर पार गरेर लुक्लामा पुग्दा यसको दुरी पुरा हुन्छ । यसमा समुन्द्री सतहदेखि ४ हजार मिटरसम्म धावकहरु दौडिनेछन् ।
ट्रेल रेस एक प्रकारको जोखिमयुक्त दौड हो । जुन हाइ अल्टिच्यूडमा गरिन्छ । यो रेशमा निश्चित दुरीमा क्याम्प तोकिएको हुन्छ र सहभागी एक दिन एक क्याम्प पार गरेपछि तोकिएको ठाउँमा बास बस्नु पर्छ । बास बसेपछि क्यम्पमा रहेका सबै धावक भोलिपल्ट एकै समयमा दौड शुरु गर्छन् । यसरी तोकिएका सबै क्याम्पहरु पार गर्दै अन्तिम बिन्दुमा पुग्दा जुन धावक कम समयमा पुग्छन्, उनी नै बिजेता बन्छन् ।
पछिल्लो समय अल्ट्रा रेसहरु तल्लो सोलु क्षेत्रदेखि सुरु हुँदा यस क्षेत्रको पर्यटन प्रर्वधनमा समेत टेवा पुग्ने स्थानीयको विश्वास छ । सोलुखुम्बुमा मात्रै दुई सातामा तीनवटा ट्रेल रेस आयोजना भइसकेको छन् । यो तेस्रो रेस हो ।
प्रतिक्रिया दिनुहोस !
