उदयपुरको बरगाछीमा चिस्यान केन्द्र
![उदयपुरको बरगाछीमा चिस्यान केन्द्र](https://annapurnapost.prixacdn.net/media/albums/chisyan-kendra_20191118061011_vOhFEKpwLX.jpg)
उदयपुर : किसानको सहजताका लागि उदयपुरको एक सामुदायिक वन समूहले चिस्यान केन्द्र सञ्चालनमा ल्याएको छ । दूध बिक्रीका लागि चिन्ता गरिरहेका किसानलाई लक्षित गरी त्रियुगा नगरपालिका १ स्थित रामजानकी सामुदायिक वन उपभोक्ता समूहले बरगाछीमा दुग्ध चिस्यान केन्द्र स्थापना गरेको हो ।
गाउँमा दूध खपत नहुने र बिक्रीका लागि ६ किलोमिटर पर रहेको सदरमुकाम गाईघाट धाउनुपर्ने समस्या भएपछि वन समूहले यस्तो व्यवस्था गरेको अध्यक्ष युवराज खनालले जानकारी दिए । समूहले ६ लाख ५० हजारको लागतमा चिस्यान केन्द्र संचालनमा ल्याएको खनालले बताए ।
सामुदायिक वनको आन्तरिक स्रोतबाट दुग्ध चिस्यान केन्द्र स्थापना भएपछि ६० घरधुरी जंगल नजिक रहेका परिवार लाभान्वित भएको छ । 'एउटा किसानलाई २÷३ लिटर दूध बेच्न सदरमुकाम धाउँदा आम्दानी नै सकिन्छ,' उनले भने, 'आम्दानी र समय दुबैको वचतका लागि यो व्यवस्था गरेका हौं।'
चिस्यान केन्द्रमा दैनिक दुई सय ५० लिटर दूध संकलन गरी गाईघाट पठाउने गरिएको अध्यक्ष खनालले जानकारी दिए । एक÷एकजना धाउनुको साटो गाउँघरमै जम्मा गरिदिने त्यसमा किसानलाई पनि राहत मिल्ने र रोजगारको अवसरमा पनि खुल्ने उनले बताए।
उनले उत्पादित दूधको बजारिकरणका लागि सामुदायिक वनले नै जिम्मा लिने भएपछि गाई भैंसी पालन व्यवसाय फस्टाउने र किसान पनि आकर्षित हुने बताए ।उनले उत्पादित दूध बिक्रीका लागि कुनै समस्या नरहेको पनि बताए ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)