विराटनगर : नेपाल भ्रमण वर्ष २०२० लाई लक्षित गर्दै बुद्ध एयरले प्रदेश नं १ बाट प्रादेशिक हवाई उडान गर्ने भएको छ । विराटनगर र भद्रपुरबाट काठमाडौं तथा पोखराका लागि सिधैं उडान भर्ने तयारी गरेको बुद्ध एयरका प्रबन्ध निर्देशक वीरेन्द्रबहादुर बस्नेतले बताए ।
यो उडान आगामी डिसेम्बर १ तारिखदेखि सुरु हुने बस्नेतको भनाई छ । विराटनगरमा सेवाका विषयमा जानकारी दिँदै बुद्ध एयरले प्रदेश सरकारको आग्रहमा भ्रमण वर्षलाई लक्षित गर्दै सो सेवा सञ्चालनमा गर्न लागेको जनाएको छ ।
उक्त सेवा सुरु भएपछि प्रदेश १ हुँदै अन्य प्रदेशमा जाने र अन्य प्रदेश हुँदै प्रदेश १ मा आउने आन्तरिक तथा बाह्य पर्यटकलाई विशेष फाइदा पुग्ने निर्देशक बस्नेतको दाबी छ ।
सो सेवा परीक्षणस्वरुप छ महिना सञ्चालन गर्ने र कम्पनीले नोक्सान व्यहोर्नुपर्ने स्थिति नभए सधैं सञ्चालन गरिने उनको भनाई छ । सातामा तीन दिन सो सेवा सञ्चालन गर्ने बस्नेतले बताए ।
कार्यक्रमा उपस्थित प्रदेश १ का मुख्यमन्त्री शेरधन राईले बुद्ध एयरको यो थालनिले सरकारको लक्षलाई सघाउ पुर्याउने बताए । सेवालाई प्रभावकारी बनाउन प्रदेश सरकारको साथ र सहयोग रहने उनको प्रतिबद्धता थियो । प्रदेश १ बाट हवाई सेवा व्यवस्थित बनाउन प्रदेश सरकारले विराटनगर विमानस्थलको सुधारमा लागेको समेत उनको भनाई छ ।
कार्यक्रममा बोल्दै आन्तरिक मामिला तथा कानूनमन्त्री हिक्मतकुमार कार्कीले यो सेवाबाट सेवाग्राहीलाई खर्च पनि कम हुने र गन्तव्यमा पुग्न सजिलो हुने भएकाले ६ महिना मात्रै नभई निरन्तरता र अन्य पहाडी क्षेत्रको उडानमा पनि कम्पनीले ध्यान दिनुपर्ने सुझाव दिए ।
उद्योग, पर्यटन, वन तथा वातावरणमन्त्री जगदीश कुसियतले विराटनगरबाट नजिक भारतको विहार प्रान्तको पटनामा मात्र विमानस्थल भएकाले भारतीय नागरिकले पनि यो सेवाबाट प्रसस्त लाभ लिन सक्ने बताए ।
प्रतिक्रिया दिनुहोस !
