जनकपुर : सीताको माइती जनकपुरमा रामको जन्ती अयोध्याबाट आइपुगेको छ । त्रेता युगमा जोडिएको ऐतिहासिक वैवाहिक सम्बन्धलाई भव्यताका साथ निरन्तरता दिन रामको जन्ती मिथिलानगरी आइपुगेको हो । हिन्दु धर्मग्रन्थ रामायणमा उल्लेख भए अनुसार त्रेता युगमा अयोध्यानरेश दशरथका छोरा राम र मिथिलानरेश जनककी छोरी सीताको विवाह भएको थियो ।
त्यस सम्बन्धलाई हालसम्म पनि जनकपुरमा प्रत्येक वर्ष सीताराम विवाहपञ्चमी महोत्सवको रूपमा मनाउने गरिन्छ । भारतको अयोध्याबाट मंसिर ५ गते नै पाँच सयको संख्यामा रामको जन्तीसहित हिँडेको साधुसन्तको टोली बिहीबार जनकपुर पुगेको हो । जन्तीलाई नेपालमा मठिहानी, जलेश्वर र पिपराका स्थानीयले भव्य स्वागत गरेका थिए ।
जनकपुर प्रवेश गर्दा जन्तीको स्वागत धनुषाका प्रमुख जिल्ला अधिकारी प्रदीपराज कणेल र सुरक्षा निकायका प्रमुखहरूले गरे । नगरपरिक्रमा गरि जानकी मन्दिर पुगेको रामको जन्तीलाई मन्दिरमा भव्य स्वागत गरियो । मन्दिरका महन्थ रामतपेस्वर दास वैष्णव, उत्तराधिकारी महन्थ रामरोशन दास वैष्णव, जनकपुरधाम उपमहानगरपालिकाका मेयर लालकिशोर साह लगायत यस क्षेत्रका गनमान्य व्यक्तित्वहरु जन्तीको स्वागतमा उभिएका थिए । सबैले फूलमाला लगाएर स्वागत गरेका थिए ।
शुक्रबार स्थानीय रंगभूमि मैदानमा विशेष कार्यक्रमकाबीच रामको जन्तीलाई राष्ट्रपति विद्यादेवी भण्डारीले स्वागत गर्ने तयारी गरिएको छ । राष्ट्रपति भण्डारी शुक्रबार जनकपुर आउने जनाइएको छ । रामसीता वैवाहिक कार्यक्रम अन्तर्गत बिहीबार रंगभूमि मैदानमा धनुषयज्ञ सम्पन्न गरिएको छ । शुक्रबार तिलकोत्सव, शनिबार मटकोर र आइतबार मुख्य विवाह समारोह हुने उत्तराधिकारी महन्थ रामरोशन दास वैष्णवले जनाए ।
रंगभूमि मैदानमा राम र सीताको स्वंम्वर गराइ भव्यताका साथ जानकी मन्दिरमा बनाइने मंडपमा विवाह हुने दासले जानकारी गराएका छन् । रामसीताको विवाहमा सहभागी हुन देशविदेशबाट हजारौंको संख्यामा दर्शनार्थीहरू जनकपुर आइपुगेका छन् ।
स्थानीय सबै धर्मशाला, मठमन्दिर, होटल र लजहरु पर्यटकले भरिभराउ छन् । महोत्सवलाई सुरक्षित र शान्तिपूर्ण रूपमा सम्पन्न गर्न प्रशासनले विशेष सुरक्षा सतर्कता अपनाएको धनुषाका प्रहरी उपरीक्षक शेखर खनालले बताए ।
प्रतिक्रिया दिनुहोस !
