जनकपुरधाम : प्रदेश २ को अस्थायी राजधानी जनकपुरमा अहिले सीताराम विवाहपञ्चमी महोत्सव चलिरहेको छ । महोत्सवका कारण जनकपुरको जानकी मन्दिर क्षेत्रमा दर्शनार्थीको घुइँचो लागेको छ।
अयोध्यानरेशका छोरा राम र मिथिलानरेशकी छोरी सीताबीच त्रेतायुगमा गासिएको वैवाहिक सम्बन्धलाई महत्व दिँदै जनकपुरमा प्रत्येक वर्ष सीताराम विवाहपञ्चमी महोत्सव मनाउने गरिएको छ ।
महोत्सवअन्तर्गत आइतबार (आज) राम र सीताको वैवाहिक कार्यक्रम छ। वैवाहिक कार्यक्रममा सहभागी हुन भारतबाट समेत हजारौं दर्शनार्थी जनकपुर आएका छन् । विवाहपञ्चमी महोत्सवअन्तर्गत बिहीबार धनुषयज्ञ, शुक्रबार तिलकोत्सव र शनिबार मटकोर विधि सम्पन्न भइसकेको छ । रंगभूमि मैदानमा राम र सीताको स्वयम्वर हुनेछ । स्वयम्वरपछि विवाह मण्डपबाट राम र सीताको वैवाहिक कार्यक्रम सम्पन्न गरिनेछ ।
वैवाहिक कार्यक्रमका लागि दुबै पक्षले छुट्टाछुट्टै तयारी गरेका छन् । विवाहका लागि गत बिहीबार नै रामको जन्ती अयोध्याबाट जनकपुर आइपुगेको थियो । वैवाहिक महोत्सवका लागि जानकी मन्दिर क्षेत्रलाई बेहुलीझै सिंगारिएको छ । देशविदेशबाट आएका दर्शनार्थीको घुइँचोका कारण यतिबेला जानकी मन्दिर वरपरको क्षेत्रमा रहेको धर्मशाला, मठमन्दिर, होटल भरिभराउ छन् । दर्शनार्थीको घुइँचोसँगै सुरक्षा व्यवस्था समेत कडा पारिएको छ ।
प्रतिक्रिया दिनुहोस !
