प्रदेश सरकारका योजनामा अख्तियारको छानविन
जनकपुरधाम : प्रदेश-२ सरकारका योजनामाथि अख्तियार दुरुपयोग अनुसन्धान आयोगले अनुसन्धान थालेको छ। आठवटा जिल्लामा वितरण भएका योजनाहरु कार्यान्वयन भएनभएको बारे अख्तियारले अनुसन्धान थालेको थालेको हो।
मंसिर ९ गते अन्नपूर्ण पोष्ट्मा प्रकाशित ‘काम नगरी बिलको चाङ्ग’ शिर्षकको समाचारलाई उजुरीको रुपमा ग्रहण गर्दै अख्तियारले छानविन थालेको प्रवक्ता प्रदीपकुमार कोईरालाले जानकारी दिए।
‘समाचारमा उल्लेख भएअनुसार प्रारम्भिक रुपमा बुझ्दा योजनाहरुमा भ्रष्टाचार भएको जस्तो लागेको छ’, प्रवक्ता कोइरालाले भने,‘यही कारण अनुसन्धान प्रक्रियाअघि बढाइएको हो।’
अख्तियारले योजना बाँडफाँड गर्ने मन्त्रालयहरुलाई मंसिर १९ गते नै पत्राचार गरि अनुसन्धान प्रकृयाअघि बढाएको छ। अख्तियारले मन्त्रालयहरुलाई पठाएको पत्रमा लेखिएको बेहोरामा प्रतिकृयासहित आवश्यक कागजात उपलब्ध गराइदिन उल्लेखित छ।