काठमाडौं : नेपाल प्रज्ञा प्रतिष्ठानमा रहेको प्रदर्शनी कक्षमा विभिन्न लेखकका पुस्तकलाई सजाएर राखिएको छ । नेपाली साहित्य, दर्शनावली, जातीय संस्कार र संस्कृति, बालसाहित्य, लैंगिक अध्ययनजस्ता पाँच सय प्रकारका पुस्तक र एक सयभन्दा बढी पत्रिकाको प्रदर्शनी चलिरहेको छ । मंसिर १ गतेदेखि पुसको अन्तिमसम्म चल्ने प्रदर्शनीमा नेपालको सम्पूर्ण परिचय पाइने पुस्तक पाइन्छ ।
प्रदर्शनीमा २०२७ सालयता प्रज्ञा प्रतिष्ठानले प्रकाशन गरेका सामग्री समेटिएको छ । यहाँ दुई रुपैयाँमा पाइने काव्य अर्चनादेखि एक हजार चार सय पर्ने प्रज्ञा नेपाली अंग्रेजी शब्दकोष समावेश छन् । पुस्तक हेरी १५ देखि ६० प्रतिशतसम्म छुट दिइएको छ ।
पुस्तक प्रदर्शनी विभागका व्यवस्थापक सुधीर ढुंगेलका अनुसार ज्ञानमा रुचि राख्नेका लागि पठन संस्कृतिको विकासमा टेवा पु¥याउन प्रदर्शनीले सहयोग गर्छ । हरेक नेपालीको हातमा प्रज्ञाको पुस्तक पु¥याउने उद्देश्यअनुसार प्रज्ञाले वर्षको दुईतीन पटक पुस्तक प्रदर्शनी गर्दै आएको छ । २०५५ सालसम्मका पत्रिका पाँच रुपैयाँ तिरेर किन्न सकिन्छ । बजार मोलभन्दा निकै सस्तोमा प्रतिष्ठानले पुस्तक उपलब्ध गराएको ढुंगेलले बताए । दुई रुपैयाँमा पाइने काव्य अर्चनामा प्रायः पाठकको नजर पर्ने गरेको छ ।
प्रदर्शनीको हालसम्म हजारौं पाठकले अवलोकन गरेको र नौ लाख बढीको पुस्तक बिक्री भएको छ । नेपाली बृहत् शब्दकोश, दर्शन संग्रह, जातीय संस्कार, नेपाली साहित्य समालोचना, अनुसन्धानात्मक पुस्तक, पुराना अभिलेखजस्ता पुस्तक पाठकले खोज्ने गरेका छन् । प्रज्ञा प्रतिष्ठानबाट प्रकाशन हुने पुस्तक लेखकले लामो समय अनुसन्धान विश्लेषण गरेर, फिल्डमा गएर मात्रै तयार पार्ने हुँदा गहन अध्ययन गर्ने पाठकका लागि उपयोगी हुने ढुंगेलको तर्क छ ।
प्रदर्शनीमा पुराना चर्चित किताब रिप्रिन्ट गरेर पनि समावेश गरिएको छ । पाठकले बढी खोज्ने किताब रिप्रिन्ट गरिन्छ ।
प्रतिक्रिया दिनुहोस !
