ओखलढुंगा : ओखलढुंगाको उत्तरी क्षेत्रमा तीन दिनदेखि लगातार हिमपात भइरहेको छ । हिउँ परेर चिसो बढेको भए पनि किसान भने खुसी भएका छन् ।
हिमपातले अवरुद्ध सिद्धिचरण राजमार्ग अन्तर्गत ओखलढुंगा–सोलु खण्ड आंशिक रुपमा सुचारु भएको छ । हिमपातले अत्याधिक चिसो बढेर सदरमुकाम ओखलढुंगामै तापक्रम शून्यमा झरेको छ ।
दुईहजार मिटरभन्दा माथिको उचाइमा हिमपात भएको हो । हिमपात र पानी परेका कारण लेकाली क्षेत्रमा रोपिएको उवा, गहुँमा सिंचाइ पुगेको छ । त्यस्तै आलु रोप्ने बारी तथा बुङ निर्माण गर्न समेत सहज हुने भएपछि किसान उत्साहित भएका हुन् ।
हिमपातले चिसो बढे पनि किसानलाई फाइदा पुगेको पात्लेका शिक्षक लाक्पा शेर्पाले बताए । उनले भने, ‘चिसो त बढ्यो तर, हिमपातले किसानलाई फाइदा पुगेको छ ।’ पुस माघमा हिमपात हुँदा समयमा पानीका मुलहरु निस्कने, सुख्खा नलाग्ने भएकाले हिमपात भएको साललाई राम्रो समय मान्ने गरिन्छ ।
खिजीदेम्वाको अधिकांश भाग, मोलुङ र सिद्धिचरण नगरपालिकाको दुई वडामा हिमपात हुन्छ । यो क्षेत्रको मुख्य खाद्यबाली आलु, उवा र गहुँ हो । वर्षादमा थोरै मकैसमेत उत्पादन हुन्छ । हिउँदमा पानी र हिउँ पर्दा लेकाली क्षेत्रमा खाद्य उत्पादन बढ्ने भएकाले हिउँ परेपछि सहकालको समय सुरु भएको भन्ने चलन छ ।
प्रतिक्रिया दिनुहोस !
