नयाँदिल्ली : भारत र ब्राजिलले साइबर सुरक्षा, जीवविज्ञान तथा स्वास्थ्य र औषधिलगायतका विभिन्न क्षेत्रलाई समेट्ने गरी १५ बुँदे सम्झौतापत्रमा शनिबार हस्ताक्षर गरेका छन् ।
ब्राजिल र भारतबीच सामाजिक सुरक्षा, साइबर सुरक्षा, वैज्ञानिक तथा प्रविधि सहकार्य, भूगोल तथा खनिज स्रोतबारे ज्ञानलाई आपसी हितका लागि आदानप्रदान गरिनेलगायतका विषय पनि सम्झौतामा उल्लेख छन् । दुबै पक्षले आपराधिक गतिविधि नियन्त्रणका लागि कानूनी सहयोग गर्ने, तेल र प्राकृतिक ग्याँसको क्षेत्रमा सहयोग गर्ने, पारम्परिक चिकित्सा प्रणाली र होमियोप्याथीको क्षेत्रमा सहयोग गर्ने सहमति भएको सम्झौताबारे संयुक्त घोषणामा उल्लेख गरिएको छ ।
भारत भ्रमणमा रहेका ब्राजिलियाली राष्ट्रपति बोल्सानारो र भारतीय विदेशमन्त्री एस जयशंकरबीच पनि शुक्रवार भेटवार्ता भएको थियो ।
भेटपछि विदेशमन्त्री जयशंकरले ट्वीटमा लेखेका छन्, ‘ब्राजिलका राष्ट्रपति बोल्सानारोलाई गणतन्त्र दिवस २०२० का अवसरमा प्रमुख पाहुनाका रूपमा स्वागत गर्न पाउँदा खुसी लागेको छ । उहाँको भ्रमणले हाम्रो द्विपक्षीय सहयोगका लागि नयाँ अवसर खुला गर्नेछ । यो विश्वव्यापी सन्तुलनको संकेत पनि हो ।’ –एएनआई
प्रतिक्रिया दिनुहोस !
