भ्रूणहत्या प्रकरण संसदमा : गाउँपालिका अध्यक्षलाई कारबाहीको माग
फागुन २, २०७६ शुक्रबार १५:४:०
विराटनगर : प्रदेश १ की सांसद उमिता विश्वकर्माले पाँचथर कुम्मायक-१ यासोककी दलित परिवारकी युवतीले अन्तरजातीय विवाह गरेकै कारण जबरजस्ती दबाबमा गर्भपन गराएको भन्दै पीडितलाई न्याय दिन माग गरेकी छिन् ।
प्रदेशसभाको शुक्रबार बसेको बैठकको शून्य समयमा बोल्दै सांसद विश्वकर्माले स्याबरुम्बाका रमेश खड्कासँग प्रेम विवाह गरेकी ती युवतीको गर्भ परिवार र स्थानीय जनप्रतिनिधिको दबाबमा फालिएपछि युवतीको बिचल्ली भएको बताइन् ।
'अन्तर्जातीय विवाह गरेकी युवती गर्भवती भएकी र उनलाई रमेशका परिवारले घरमा समेत नभित्र्याएको र दबाबमा गर्भपतन गराएर युवतीलाई एक्लै छाडेको छ, उनको स्वास्थ्य अवस्था नाजुक छ, 'सांसद विश्वकर्माले भनिन्, 'गर्भपतन गराउन दबाब दिने र अन्तरजातीय विवाहकै कारण युवतीलाई हिंसा गर्नेलाई कारवाही गरोस्।'
पाँचथरको कुम्मायक गाउँपालिका अध्यक्ष जयकुमार चेम्जोङ र परिवारको दबाबमा ती युवतीको २१ हप्ताको भू्णहत्या गरेको खुलेको पीडित परिवारको आरोप छ । मेघा बैंक कुम्मायक शाखामा कार्यरत कुम्मायक ५ स्याबरुम्बाका रमेश खड्का र यासोक बजारकी ती दलित युवतीले साउन २८ गते पाँचथर सदरमुकाम फिदिमको शिवालय मन्दिरमा विवाह गरेका थिए ।
विवाहपछि रमेशको परिवारले घरमा ल्याउन नदिएपछि रमेशले ती युवतीलाई कोठामा लिएर राखेका थिए । परिवारको दबाबपछि पुष २४ गते पाँचथर सदरमुकाम फिदिमको समर्पित अस्पतालमा लगेर २६ गते राती जबरजस्ती गर्भपतन गराइएको पीडित युवतीकी आमाको आरोप छ।२८ गते अस्पतालबाट युवतीलाई डिस्चार्ज दिइएका थियो । गर्भपतन गराएपछि रमेश सम्पर्कबिहीन छन् ।
पीडित युवतीले गाउँपालिका अध्यक्षसहित सातजनाविरुद्ध माघ २२ जिल्ला प्रहरी कार्यालयमा जाहेरी दिएकी छिन् । जोहेरी परेकामध्ये तीनजनालाई प्रहरीले नियन्त्रणमा लिएको छ।अध्यक्ष भने फरार छन् । पाँचथरका प्रहरी निरीक्षक रोमनराज आर्यालले फरार रहेका अध्यक्षसहितका अन्यको खोजि भइरहेको बताएका छन्।
प्रतिक्रिया दिनुहोस !
