प्रदेश १ सरकारले राष्ट्रिय प्रजातन्त्र दिवस भव्य बनाउने

विराटनगर : ७० औँ राष्ट्रिय प्रजातन्त्र दिवस प्रदेश १ सरकारले भव्यरुपमा मनाउने निर्णय गरेको छ। राष्ट्रिय प्रजातन्त्र दिवस प्रदेश मूल समारोह समितिको शुक्रबार बसेको बैठकले नागरिकसम्म पुगेर दिवस मनाउने निर्णय गरेको आन्तरिक मामिला तथा कानुनमन्त्री हिक्मतकुमार कार्कीले जानकारी दिए। 

प्रदेश मूल समारोह समितिका अध्यक्ष तथा मुख्यमन्त्री शेरधन राईको उपस्थितिमा बसेको बैठकले दिवस सम्पन्न गर्न आन्तरिक मामिला तथा कानून मन्त्रालयका सचिव सचिव संयोजक रहने गरी समारोह व्यवस्थापन उपसमिति बनाएको छ भने विभिन्न उप–समिति पनि निर्माण गरेको छ। 

फागुन ६ गते प्रदेशभित्रका सबै सरकारी कार्यालयले आ–आफ्नो कार्यालय परिसरमा सरसफाइ गर्ने, फागनु ७ गते बिहान ७ बजे रोडशेष चोकमा भेलाभई मुख्यमन्त्री तथा मन्त्रिपरिषद्को कार्यालयसम्म प्रभातफेरी गर्ने र मूलसमारोहमा परिणत हुने तथा फागुन ८ गते सामाजिक विकास मन्त्रालयले सबै जिल्ला अस्पतालका बिरामी, वृद्धाश्रम, अनाथालयमा फलफूल वितरण गर्ने र तीनै दिन साँझ दिपावली गर्ने निर्णय भएको छ।

यस्तै धनकुटाको शहीदभूमि गाउँपालिकामा छिन्ताङ काण्डका शहीदप्रति सम्मान र परिवारलाई राहत उलब्ध गराउने, प्रदेशका सञ्चारमाध्यमले प्रजातन्त्र दिवस विषयमा केन्द्रित रही विशेष कार्यक्रम सञ्चालन गर्ने निर्णय पनि बैठकले गरेको छ।