सेक्स गरे दण्डित हुनुपर्ने कानुन खारेजीको माग
अमेरिकाजस्तो खुला समाजमा पनि अविवाहितलाई शारीरिक सम्बन्ध बनाउन बन्देज लगाउने कानुन अझै जीवित रहेछ । कुरा, भर्जिनिया राज्यको हो । यहाँको कानुनले अविवाहितले यौन सम्बन्ध कायम गरे त्यसलाई व्यभिचार मान्छ । विवाहित जोडीबाहेक अरूलाई शारीरिक सुखको अधिकार कानुनतः प्राप्त हुँदैन । अविवाहितले सहमतिमा पनि सेक्स गर्न पाउँदैनन् ।
अविवाहित जोडीले यौन सम्पर्क गरे त्यसलाई व्यभिचारको अपराध मानिन्छ । सजायस्वरूप २ सय ५० डलरसम्म जरिवाना हुन सक्छ ।
हालसालै अलेक्जान्ड्रिया शहरका प्रतिनिधि मार्क लेभिनले आन्तरिक विधेयक (हाउस बिल) प्रस्तुत गर्दै व्यभिचारसम्बन्धी पुरानो कानुन खारेजीको प्रस्ताव गरेका छन् । उनले पुरानो कानुनलाई भिक्टोरिया कालको कानुन भनेका छन् । ‘कानुनमा असंवैधानिक प्रावधान राख्नु गलत हो,’ लेभिनले भने, ‘कसैले पनि सेक्सजस्तो सामान्य अभ्यास गरेबापत दण्डित हुनु हुँदैन ।’
हुन त भर्जिनियामा व्यभिचारको अपराधमा बिरलै सजाय भएका छन् । तर, कानुनले ‘अश्लील प्रदर्शन’जस्ता अपराधसँग जोडेर मान्छेहरूलाई सजायको भागी बनाउन सक्छ ।
लेभिनले अधिकांश भर्जिनियावासीले अविवाहित अवस्थामै शारीरिक सम्बन्ध बनाउन सुरु गर्ने बताए । ‘पुरानो कानुन मूर्खतापूर्ण छ,’ उनले भने, ‘यसको खारेजी जरुरी छ ।’
व्यभिचारसम्बन्धी भर्जिनियाको कानुनले भन्छ– नैतिकता र शिष्टताविरुद्धका अपराध दण्डनीय छन् ।
विधायक लेभिन सम्पूर्ण भर्जिनियावासीले पुरानो कानुन रद्द गर्न चाहेको बताए । ‘भर्जिनिया प्रेमीहरूको राज्य हो,’ उनले भने, ‘कानुनतः प्रेम गर्न वर्जित भएपछि यो कसरी प्रेमीहरूको राज्य भयो ?’ व्यभिचारसम्बन्धी कानुन खारेजीको प्रस्ताव भएको विधेयक हाल अमेरिकी संसद् सिनेटमा पुगेको छ ।