काठमाडौं : पूर्वप्रधानमन्त्री डा. बाबुराम भट्टराईले आफू नेतृत्वको सरकारले कानुनसम्मत रूपमा मातातीर्थको १७३ रोपनी जग्गा मोही कायम गरेर वितरण गरेको बताएका छन् । प्रधानमन्त्री केपी ओलीले सरकारी जग्गा व्यक्तिका नाममा गरिएको निर्णयमाथि छानबिन गर्ने बताएपछि भट्टराईले जानीबुझी व्यक्तिका नाममा नामसारी गरेको स्पष्ट पारेका हुन् ।
नेपाल ट्रस्टको नामको १७३ रोपनी जग्गा भट्टराई प्रधानमन्त्री हुँदा व्यक्तिको नाममा नामसारी गरिएको भन्दै मंगलबार ट्रस्टले श्वेतपत्र जारी गरेको थियो ।
भट्टराई नेतृत्वको सरकारले २०६९ कात्तिक १४ गते मोही कायम गरेर सरकारी जग्गा व्यक्तिका नाममा नामसारी गर्ने निर्णय गरेको थियो । उक्त निर्णय राजनीतिक, कानुनी र नैतिक रुपमा सही भएको भट्टराईले दाबी गरे ।
बालुवाटारस्थित ललिता निवासको जग्गा प्रकरणपछि अन्य सरकारी जग्गाको पनि छानविन गर्ने बताएका प्रधानमन्त्री ओलीप्रति भट्टराईले आक्रोश पोखे । २०५१ सालमा तत्कालीन गृहमन्त्री केपी ओलीलाई ज्ञापनपत्र बुझाउन गएको सन्दर्भ उल्लेख गर्दै भट्टराईले ‘फेरि पनि आगो बाल्ने’ चेतावनी दिए । ‘लोकमान (तत्कालीन अख्तियार प्रमुख) झैं तर्साएर झुकाउँछु भन्ने ठान्नुभएको भए त्यो प्रसंग (०५१ सालको) सम्झँदा राम्रो हुन्छ,’ बुधबार प्रतिनिधिसभामा विशेष समय लिएर भट्टराईले भने, ‘जनयुद्धमा कसरी आगो बालेको थियो र त्यसको परिणाम के भयो सम्झिँदा हुन्छ ।’
ललिता निवास र मातातीर्थको जग्गा वितरण फरकफरक विषय भएको डा. भट्टराईले तर्क गरे । ‘मेरो सरकारको पालामा भएको निर्णय राजनीतिक, कानुनी र नैतिक रूपमा सही छ,’ भट्टराईले भने । संघीय समाजवादी पार्टीका संघीय परिषद अध्यक्ष डा. भट्टराईले आफूलगायत नेताहरुको सम्पत्ति छानबिन गर्न पनि माग गरे ।
प्रतिक्रिया दिनुहोस !
