डुडुवा (बाँके) : बाँकेको डुडुवा गाउँपालिका ६ आसमानपुरस्थित जयेन्दु बाल सुधार गृहमा छाला रोगको संक्रमण देखिएको छ । त्यहाँ रहेका एक सय ३५ जनामध्ये अधिकांशमा लुतो र दाद देखिएको छ ।
लायन्स क्लब नेपालगन्ज पीएनएलएफको आयोजना तथा नेपालगन्ज मेडिकल कलेज शिक्षण अस्पताल नेपालगन्जको प्राविधिक सहयोगमा बिहीबार सञ्चालन गरिएको निःशुल्क स्वास्थ्य शिविरमा उपचार गरेका एक सय ३२ जनामा लुतो र दादको संक्रमण भेटिएको छाला रोग विशेषज्ञ डा.कुमार पोख्रेलले जानकारी दिए ।
उनले भने, 'एकै ठाउँमा बस्नेहरुमा लुतो चाँडो संक्रमण हुन्छ । ओछ्यान, लुगा, चप्पलको साझा प्रयोग हुँदा संक्रमण चाँडो चाँडो फैलन्छ । उपचार गरिएका अधिकांशमा लुतो र दादको समस्या पाइयो ।'
स्वास्थ्य शिविरमा उनीहरुलाई निःशुल्क औषधि वितरण गरिएको अस्पतालका प्रशासन प्रमुख कुमार अधिकारीले बताए । बाल गृहमा एक वर्षदेखि लुतो र दादको समस्या रहेको र जति उपचार गर्दा पनि निको नभएको बाल सुधार गृह प्रशासनले जनाएको छ ।
यसअघि भेरी अस्पतालका चिकित्सकले पनि बाल सुधार गृह पुगेर नै उपचार गरेका थिए । स्वास्थ्य शिविरमा लायन्स क्लब नेपालगन्ज पीएनएलएफका अध्यक्ष रश्मी कनोडिया, नेपालगन्ज मेडिकल कलेज शिक्षण अस्पतालका वोर्ड अफ डाइरेक्टर अजय कनोडिया, अस्पतालका सहायक निर्देशक डा.नितेशकुमार कनोडिया र क्लबका संस्थापक अध्यक्ष सन्जय थापालगायतको सहभागिता रहेको थियो ।
प्रतिक्रिया दिनुहोस !
