धनगढी : बुवाको रेटिएको घाँटी, आमाको रक्ताम्य मृत शरीर । मध्यरातमा घरमा कोही छैनन् । रातभरि आमाको स्तन खोजिरहेकी ७ महिने अवोध ममताको हातमा बुवाको घाँटीबाट बगिरहेको रगत मात्रै लाग्थ्यो ।
७ महिने ममता भण्डारी, अर्को दिन दिउँसो १ बजे रुदाँ रुँदै थकित भएको अवस्थामा फेला परिन् । ममताकै लागि दुध लगेर गएकी दिदी नाता पर्ने छिमेकी पार्वती भाटले ममताका बुवा ५२ वर्षका जयराज भण्डारी र २२ वर्षीया आमा धना विष्ट भण्डारीको हत्या भइकेको कारुणिक दृष्य देखिन् ।
फागुन १४ गते मध्यराती कञ्चनपुरको शुक्लाफाँटा नगरपालिका-११ कलुवापुरका ५२ वर्षीय जयराज भण्डारी र २२ वर्षीया धना विष्ट भण्डारीको विभत्स हत्या भयो । दुवै जनाको घाँटी रेटेर निर्मम हत्या भएको र ७ महिनाकी छोरी ममता घाइते अवस्थामा फेला परिन् ।
फागुन १४ गते राती आमाको काखमा सुतीरहेकी ममतालाई हत्याराले लुटेर लग्यो । घाँटी रेटिएर रगत लतपत भएका बुवाको लाशमा रुँदै गरेको अवस्थामा घाइते फेला परेकी ममता अहिले माया मेट्रो अस्पतालको एनआईसीयुमा छिन् । ‘बुवाको रगतले लतपतिएको अवस्थामा उनलाई भदै पार्वती भाटले भेटिछन्’, ममताकी मावली पट्टीकी बज्यै रम्भा विष्टले भनिन्, ‘भित्र रोइरहेको देखेपछि पार्वती भित्र छिरिन् र यस्तो विभत्स घटना देखिनछन् ।’
जयराजको पहिलो श्रीमतीको क्यान्सरका कारण मृत्यु भएपछि धनासँग उनको विवाह २०७५ सालमा भयो । जयराजका पहिलो श्रीमतीपट्टिका दुई छोरा र एक छोरी छन् । अचानक भएको भण्डारी दम्पत्तीको हत्यारा अहिलेसम्म पत्ता लागेका छैनन् ।
माया मेट्रो अस्पतालका बालरोग विषेशज्ञ डाक्टर मोहन साउद ममताको उपचारमा खटिएका छन् । टाउकोमा चोट लागेको र निमोनिया भएकी ममताको अवस्था सुधार हुँदै गएको डाक्टर साउद बताउँछ् ।
‘सुरुमा अस्पताल ल्याएका बेला त अवस्था गम्भीर नै थियो, अहिले एकदमै सुधार आएको छ’, डाक्टर साउदले भने, ‘निमोनिया पनि भएको थियो, टाउकोमा गम्भीर चोट थियो, पछारेको जस्तो, तर अहिले एकदमै सुधार आएको छ, एक-दुई दिनमा एनआईसीयुबाट बाहिर सार्छौं ।’
उनको उपचारमा लाग्ने सबै खर्च माया मेट्रो अस्पतालले निशुल्क गरिदिएको छ । ‘बुवा आमाको हत्याको खबर थाहा पाएपछि, ममता अनाथ भएको थाहा पायौं। अस्पतालको सम्पूर्ण खर्च निशुल्क गरिदिएका छौं’, धनगढीको माया मेट्रो अस्पतालका अध्यक्ष धिरेन्द्र साउदले भने ।
हत्यारा पत्ता लगाउन प्रहरी असफल
दम्पत्तीको हत्यामा संलग्नको खोजी भइरहेको बताउँदै आएका कञ्चनपुर प्रहरीले केहीलाई सोधपुछ गरे पनि, अहिलेसम्म हत्यारा पत्ता लगाउन भने सकेको छैन । दम्पत्तीको हत्या गरी अवोध बालिकालाई घाइते बनाएर जाने क्रुर अपराधीलाई खोज्न कञ्चनपुर प्रहरी सक्रिय पनि नदेखिएको पीडितका आफन्तले बताएका छन् ।
‘छोरी ज्वाइका हत्यारा अहिलेसम्म पनि पत्ता लागेका छैनन्, प्रहरी सक्रिय भएको अनुभुती भएको छैन’, आमा रम्भा विष्टले भनिन् । उनले छिटोभन्दा छिटो छोरी र ज्वाइका हत्यारा पत्ता लगाएर न्याय दिन आग्रह गरिन् ।
कञ्चनपुर प्र्रहरीले भने अपराधी नै पत्ता नलागे पनि, त्यसको केही नजिक पुगेको बताएको छ । कञ्चनपुरका प्रहरी नायव उपरीक्षक रविन्द्र पौड्यालले अनुसन्धान भइरहेको र छिट्टै पत्ता लाग्ने बताए ।
प्रतिक्रिया दिनुहोस !
