उदयपुर : छिमेकी मुलुक भारतबाट घरतर्फ आउँदै गरेका २१ जनालाई उदयपुरको वेलसोतमस्थित क्वारेन्टाइनमा राखिएको छ । भारतको सिलिगुडीबाट काँकडभिट्टा हुँदै उदयपुरको ताप्लि गाउँपालिका हिंडेका २१ जनालाई कटारी नगरपालिका १ बेलसोत स्थित नेपाली सेनाको १८ नम्बर वाहिनी मातहतको रणशार्दुल गणको सुरक्षा वेस क्याम्पको क्वारेन्टाइनमा राखिएको हो ।
कटारी बजार प्रवेश गरेका उनीहरुलाई कटारी अस्पताल परिसरमा कटारी नगरपालिकाले स्थापना गरेको हेल्थडेक्समा स्वास्थ्य जाँच गरिएको थियो । स्वास्थ्य जाँचका क्रममा एकजनालाई ज्वरो देखापरे पछि सबैलाई क्वारेन्टाइनमा राखिएको मेयर ज्ञानेन्द्र श्रेष्ठले बताए ।
मेयर श्रेष्ठले भारतको सिलिगुडीबाट १५ जना र अन्य विहार, दिल्लीबाट आएका गरी २१ जनाको चेकजाँच गरिएको बताए । उनले भने, 'एकजनामा ज्वरो देखा पर्यो त्यसैले हामीलाई शंका लागेकाले बीरामीलाई आइसोलेसन र अन्यलाई क्वारेन्टाइनमा राखेका हौं ।'
इलाका प्रहरी कार्यालय कटारीका डिएसपी प्रेम सागर केसीका अनुसार बाटोमा आउने क्रममा सोधीखोजी गर्दा भारतको विभिन्न ठाउँबाट आएको जनाएपछि स्वास्थ्य परीक्षण गराइएको हो ।
यसैबीच भारतबाट नेपालको काकरभिट्टाहुँदै अन्य ६ जना बुधबार साँझ उदयपुर आइपुगेका छन् । उदयपुरको विभिन्न ठाउँ घर बताउने उनीहरुको स्वास्थ्य परीक्षण भइरहेको जिल्ला जनस्वास्थ्य कार्यालयका प्रमुख मोहनप्रसाद सुवेदीले बताए ।
उनले ६ जना नै संक्रमित देशबाट आएकाले केहि दिनका लागि क्वारेन्टाइनमा राख्ने तयारी भइरहेको बताए । प्रमुख सुवेदीले रोग भित्रिन नदिन र समयमा उपचारको व्यवस्था गर्न विदेशबाट आएका जिल्लाबासीको खोजी कार्य जारी राखिएको बताए ।
प्रतिक्रिया दिनुहोस !
