माछालाई थापेको एम्बुसमा परेर युवकको मृत्यु
उदयपुर : माछा मार्ने क्रममा आफैंले थापेको विद्युतीय एम्बुस (करेन्ट) लागेर उदयपुरका एक युवकको मृत्यु भएको छ । बुधबार दिउँसो त्रियुगा नदीको दहमा करेन्ट लगाएर माछा मार्ने क्रममा अचानक करेन्ट लाग्दा त्रियुगा नगरपालिका २ खैजनपुरका २४ वर्षीय ज्योतिकुमार राईको मृत्यु भएको हो ।
करेन्ट लागेर गम्भीर घाइते भएका राईलाई स्थानीयले उद्दार गरी उपचारका लागि गाईघाटस्थित सिभिल अस्पताल ल्याएका थिए । अस्पतालमा उपचारकै क्रममा उनको मृत्यु भएको जिल्ला प्रहरी कार्यालय उदयपुरका एसपी वीरबहादुर बुढामगरले जानकारी दिए ।
एक श्रीमती र दुई नाबालक सन्तान रहेका मृतक केही महिनाअघि मात्र वैदेशिक रोजगारबाट घर फर्केका थिए । मृतकको शव पोष्टर्माटम गरी आफन्तको जिम्मा लगाइएको एसपी मगरले जानकारी दिए ।