भोजपुर : कोरोना भाइरसको सावधानी अपनाउँदै सरकारको 'लक डाउन' यतिबेला देशैभर जारी छ । संक्रमित बिरामीका लागि जिल्लाका विभिन्न स्थानमा धमाधम आइसोलेसन कक्ष र क्वारेन्टाइन थपिने र बन्ने क्रममा छन् । तर पर्याप्त उचित उपकरण र रोकथामको औषधि नहुँदा तयारी शून्य देखिएको छ ।
आइसोलेसन र क्वारेन्टाइन राखिएपनि स्वास्थ्य चिकित्सकलाई पीपीई, थर्मोलोगन, सर्जिकल मास्क र सेनिटाइजर नै अभाव हुन थालेको हो । शंकास्पद बिरामीलाई आइसोलेसन कक्षमा राखिने व्यवस्थापन गरिएपनि तत्काल रोकथामका लागि आवश्यक भेन्टिलेटर, पीपीई, कोरोनाको स्याम्पल पठाउने (भिपी क्यारियर) जस्ता उपकरण र औषधि अभावले झन समस्या थपिएको जिल्ला अस्पताल भोजपुरका डा. अमितेश राज पाण्डे बताउँछन् ।
'आईसोलेसन र क्वारेन्टाइन तयारी अवस्थामा छन्, तर उपचारका लागि उपकरण र औषधि छैन, डा. पाण्डेले भने, 'बिरामी आइहाले उपचार गर्ने न विधि छ न औषधि न कुनै उपकरण हामीलाई नै जोखिम बढी हुन्छ।'
यसअघि संक्रमणको जोखिमलाई ध्यानमा राखेर जिल्ला अस्पतालमा १० शैया, प्राथमिक स्वास्थ्य चौकी प्याउलीमा ६ शैया र हतुवागढी गाउँपालिकास्थित ४ शैया गरी २० शैयाको आइसोलेसन कक्ष बनाईएको छ । आइसोलेसनसँगै जोखिमको पूर्वतयारीका लागि जिल्लाका विभिन्न स्थानमा धमाधम क्वारेन्टाइन राखिएको छ ।
भोजपुर नगरपालिकाको टक्सारस्थित पर्यटन सूचना केन्द्रमा ४० शैया, सुम्निमा पोलिटेक्निक इन्स्टिच्युडमा ६० शैया, षडानन्द नगरपालिकास्थित गान्धी मेमोरियल हस्पिटलमा ३० शैया, साल्पासिलिछो गाउँपालिकाको जाल्पा माविमा ४ शैया, हतुवागढी गाउँपालिकाको भिमेश्वरी माविमा ५० शैया, पात्लेपानीमा १० शैया, जिल्ला प्रहरी कार्यालयमा ३ शैया, अरुण गाउँपालिकाको शारदा माविमा ३० शैया, जरायोटारमा १० शैया, चम्पेमा ३ शैया, याकुको विर्ता प्राविमा ३ शैया गरी जिल्लाभर २ सय ४३ शैयाको क्वारेन्टाइन व्यवस्था गरिएको छ ।
यसबाहेक टेम्केमैयुङ गाउँपालिका, पौवादुङमा गाउँपालिका, रामप्रसाद राई गाउँपालिका र आमचोक गाउँपालिका भने कुनै तयारी कुनै तयारी छैन । संक्रमणको जोखिम कम र बाह्य आगन्तुकलाई प्रवेशमा निषेधाज्ञा राखिएकाले तयारी कम गरिएको टेम्केमैयुङ गाउँपालिका अध्यक्ष ध्रुवराज राईले बताए । भने, 'संक्रमणको जोखिम भए आवश्यक स्वास्थ्य व्यवस्था गरिनेछ।'
यसअघि षडानन्द नगरपालिका वडा नं १, नेपालेडाँडाका २ जनालाई रुघाखोकीले ग्रस्त बनाएपछि तत्काल दिङ्लास्थित कृषि भवनको क्वारेन्टाईनमा राखिएको थियो । दुवै कतार र भारतबाट केहि साताअघि मात्र घर आएका थिए । तर उनीहरुको स्वास्थ्य अवस्था भने हाल सामान्य रहेको नगरपालिकाकी उपमेयर मेरिका राईले जानकारी दिइन् । जिल्लाका विभिन्न १० सार्वजनिक स्थान र सीमाक्षेत्रमा हेल्थ डेस्कसहित स्वास्थ्य सुरक्षा टोली परिचालन गरिएको छ ।
प्रतिक्रिया दिनुहोस !
