बेंसीशहर: लमजुङको मर्स्याङ्दी गाउँपालिका-६ ठुलोबेंसीमा निर्माणाधिन न्यादी हाइड्रोपावरको निर्माणपक्ष चिनियाँ र स्थानीयबीच झडप भएको छ।
लकडाउनलाई कडाई गर्न स्थानीयले गाउँ भित्रने नाकामा तगारो लगाएका थिए। सो तगारो भत्काएर निर्माण पक्ष चिनियाँ कम्पनीले ट्रवाइन बोकेको २ वटा ट्रक भित्राएको थियो। गाउँ हुँदै ट्रक भित्राउन खोजेपछि स्थानीय युवाहरुले अवरोध गरेका थिए। स्थानीयको अवरोध हटाउन चिनियाँ पक्ष स्थानीयमाथि जाइलागेपछि झडप भएको एक स्थानीयले बताए। केहीबेर स्थानीयले ढुङ्गामुढा गरेपछि चिनियाँहरु भागेका थिए।
स्थानीयले हाइड्रोपावरको एउटा लोडरमा क्षति पुर्याएका छन्। आयोजनामा कार्यरत स्थानीय विष्णुराज घिमिरेका अनुसार स्थानीयको डरका कारण आयोजनामा कार्यरत चिनियाँ र नेपालीहरु घर बाहिर निस्कन सकेका छैनन्। घटनास्थलमा प्रहरी पुगेर स्थानीयलाई सम्झाउने काम गरिरहेको छ। साँझसम्म स्थानीय र प्रहरीबीच कुरा मिल्न सकेको छैन्।
यसअघि चीनबाट कामदार गाउँ भित्राएको भन्दै स्थानीय आक्रोशित बनेका थिए। सरकारले निर्माण कार्य रोकेर लकडाउनलाई कार्यन्वयन गर्न आग्रह गरिरहेका बेला काम नरोकी गाउँलेलाई त्रसित बनाएको स्थानीय बताउँछन्। न्यादी आयोजनाको निर्माण कार्यमा खटिएका चिनियाँ प्राविधिक नयाँ वर्ष मनाउन जनवरी ५ तारिखमा चीन गएर एक महिनाअघि फर्किएका थिए। ३० मेगावाट क्षमताको न्यादी जलविद्युत आयोजनाको निर्माण चिनियाँ कम्पनी च च्याङ हाइड्रोपावर कन्स्ट्रक्सन एन्ड इन्स्टलेसन कम्पनी लिमिटेडले गरिरहेको छ।
प्रतिक्रिया दिनुहोस !
