भोजपुर : कोरोना संक्रमणको आशंका भएको भन्दै स्वास्थ्यकर्मीको टोली नै क्वारेन्टाइनमा बसेपछि दैनिक स्वास्थ्य सेवा प्रभावित बनेको छ । षडानन्द नगरपालिकाका वडाका स्वास्थ्य चौकीमा सेवारत १७ जना स्वास्थ्यकर्मी नै संक्रमणको जोखिम भएको भन्दै क्वारेन्टाइनमा रहेपछि सेवा प्रवाहमा असर पुगेको हो ।
वैदेशिक रोजगारको शिलशिलामा कतारबाट घर आएका षडानन्द नगरपालिका १, नेपालेडाँडाका एक युवकको स्वास्थ्य परीक्षण गरेपछि संक्रमणको जोखिम भएको भन्दै उनीहरू नगरपालिकाले बनाएको क्वारेन्टाइनमा बसेका हुन् । क्वारेन्टाइनमा बसेपछि स्वास्थ्य चौकीमा सिटामोलसम्म दिने मान्छे छैन । करिब एक साताअघिबाट उक्त हस्पिटलमा नगरपालिकाका वडा नं १, २, १०, ११, र १२ का स्वास्थ्य चौकीका १७ जना क्वारेन्टाइनमा छन् । जसमध्ये ११ जना गान्धी मेमोरियल हस्पिटल र बाँकी ६ जना हेल्थ डेस्क राखिएको क्वारेन्टाइनमा छन् ।
दुईसाताअघि ५ जना स्वास्थ्यकर्मीको आरआरटी टोलीले करिब कतारबाट आएका ती युवाको घरमै पुगेर स्वास्थ्य चेकजाँच गरेका थिए । चेकजाँचपछि अन्य १२ जना स्वास्थ्यकर्मीसँग एकआपसमा संगै खाएको, बसेको, हिँडेकोले जोखिम हुन सक्ने भन्दै स्वास्थ्य चौकी नै रित्ताएर क्वारेन्टाइनमा बसेका हुन् । सर्वसाधरणको स्वास्थ्य सेवालाई वेवास्ता गर्दै कोरोनाको आशंकामा क्वारेन्टाइनमा बस्नुले सेवाग्राही मारमा परेको नेपालेडाँडाका स्थानीय सन्तोष राईले बताए । उनले भने, ‘स्वास्थ्य चौकी नै रित्ताएपछि हामीले कहाँबाट सेवा लिने, यस्तो लापारबाही गरेर उनीहरू आनन्दले क्वारेन्टाइनमा छन्।’ कतारबाट आएका ती युवालाई पनि नगरपालिकाको कृषि भवनमा बनाइएको क्वारेन्टाइनमा राखेको छ । उनको १४ दिन पुगेपछि क्वारेन्टाइनबाट सबै स्वास्थ्यकर्मी पुनः काममा फर्किने नगरपालिकाका स्वास्थ्य शाखा प्रमुख सुन्दर श्रेष्ठले बताए ।
औषधि, चेकजाँच, उपचारका लागि स्वास्थ्य चौकी धाउने सर्वसाधरण रित्तै हात फर्किनु परेको सुनाउँछन् । स्वास्थ्य चौकीमा स्वास्थ्यकर्मी नै नभेटेपछि बजारका मेडिकलबाट मंहगो औषधि लिन बाध्य भएको दिङ्लाका स्थानीय दावा शेर्पाले गुनासो गरे । विपतको अवस्थामा स्वास्थ्यकर्मी कोरोनाको आशंकामा चुपचाप क्वारेन्टाइनमा बस्दा सेवाबाट बञ्चित हुनुपरेको उनले बताए ।
नगरपालिकाकी उपमेयर मेरिका राईले स्वास्थ्यकर्मीले असुरक्षित महसुस गरेपछि क्वारेन्टाइनमा बसेको बताइन् । कतारबाट आएका ती युवासँगै भारतको मुम्बइबाट आएका सोही नेपालेडाँडाकै अर्का युवालाई क्वारेन्टाइनमा राखिएको छ । उनीहरूको स्वास्थ्य अवस्था सामान्य रहेको उपमेयर राईले भनाइ छ ।
प्रतिक्रिया दिनुहोस !
