ओखलढुंगा : लकडाउनले उपकरण ढुवानी रोकिएपछि राष्ट्रिय प्रथामिकता प्राप्त आयोजना सोलु करिडोरको काम प्रभावित भएको छ । १ सय ३२ केभी प्रशारण लाइनको उक्त आयोजनाको काम प्रभावित बनेको हो ।
सरकारले ठूला आयोजनालाई काम गर्न अवरोध नगर्ने निर्णय गरे पनि आयोजनाको काम पूर्णरुपमा सञ्चालनमा आउन सकेको छैन । केही मजदुरले तार तान्न टावर जडान गर्ने लगायतका केही काम भने चलिरहेका छन् । सिराहाको मिर्चैया, उदयपुरको कटारी, ओखलढुंगा सदरमुकाम हुँदै सोलुखुम्बुको तिङ्ला प्रशारण लाइन जोड्ने आयोजनामा खटिएका साढे ४ सय मजदूर लकडाउनका कारण काममा निस्कन सकेका छैनन् । भारतीय कामदार भएका कारणले स्थानीयले अनावश्यक शंका गर्ने र सहजीकरण नगर्दा उनीहरु क्वारेन्टाइनमै रहेका छन् ।
लकडाउनअघि उदयपुरको मरुवा क्षेत्र, ओखलढुंगाको केत्तुके क्षेत्र र सोलुखुम्बुको पत्ताले क्षेत्रमा काम भइरहेको थियो । आयोजनाको ९० किलोमिटर क्षेत्रमा निर्माण गर्नुपर्ने ३ सय ३ वटा टावरमध्ये २ सय ५५ वटा टावर निर्माण सम्पन्न भइसकेका छन् । आउँदो मे ३१ सम्म सम्पन्न गरिसक्नुपर्ने आयोजना लकडाउनका कारण डप्प हुँदा काम सक्ने अवस्था नआएको आयोजना प्रमुख जनार्दनप्रसाद गौतमले बताए ।
आयोजनाको काम गरिरहेको भारतीय ठेकेदार कम्पनी मोहन इनर्जी कर्पोरेशनले काम सञ्चालन गर्न समस्या भएको जनाएको छ ।आयोजना प्रमुखलाई ठेकेदार कम्पनीले काम गर्ने वातावरण निर्माणका लागि आग्रह गरेको छ ।
प्रतिक्रिया दिनुहोस !
