दाङ : दाङको तुलसीपुरमा रहेको तुलसीपुर खानेपानी तथा सरसफाई उपभोक्ता संस्थाले उपभोक्ताले तिर्दै आएको खानेपानी महसुल छुट गरेको छ । कोरोना भाइरसको महामारीका कारण देशमा लकडाउन भइरहेको मध्यनजर गर्दै लकडाउन अवधिको एक महिनाको खानेपानी महसुल छुट दिएको संस्थाका अध्यक्ष खेमराज वलीले बताए । यो रकम झण्डै १२ लाख हुन आउँछ ।
संस्थाको बैशाख २५ गते बसेको बैठकले लकडाउनका कारण उपभोक्तालाई आर्थिक भार परेको भन्दै एक महिनाको महसुल छुट दिने निर्णय गरेको छ । चैत महिनाको न्यूनतम शुल्क छुट गर्ने निर्णण गरिएको र न्यूनतमभन्दा बढी महसुल आउने उपभोक्ताले भने बढी आएको महसुल रकम तिर्नु पर्ने सचिव मनोज लामिछानेले बताए । संस्थाका आठ हजार उपभोक्तालाई एक महिनाको न्यूनमत महसुल छुट दिने निर्णय गरिएसँगै संस्थालाई १२ रुपैयाँ मासिक व्यभार पर्ने छ । लकडाउन लम्बिंदा आम्दानीका सबै श्रोत बन्द भएको र उपभोक्तामा आर्थिक भार परेको कुरालाई मध्यनजर गरी महसुल छुटको निर्णय गरिएको उनले बताए ।
तुलसीपुर खानेपानीमा रहेका आठ हजार उपभोक्तामध्ये एक सय ५० संस्थागत र सात हजार आठ सय ५० व्यक्तिगत धारा रहेका छन् । संस्थागतको मासिक न्यूनमत महसुल तीन सय ५० र व्यक्तिगत खानेपनी महसुल एक सय ५० रहेको छ । हरेक उपभोक्तालाई एक महिनाको न्यूनतम शुल्क छुट दिँदा पनि संस्थालाई १२ लाख रुपैयाँ बढी व्ययभार थपिने कोषाध्यक्ष सिताराम शर्मा आचार्यले बताए ।
बैठकले लकडाउन अवधिभरको विलम्व (जरिवाना) शुल्क छुट दिने पनि निर्णय गरेको सचिव मनोल लामिछानेले जानकारी दिए । खानेपानी संस्थाको यो निर्णयले आठ अजार उपभोक्ताहरु प्रत्यक्ष रुपमा लाभाम्वित भएका छन् । खानेपानीले उपभोक्ताहरुको सहजताका लागि गत वर्षबाट डिजिटल भुक्तानीको समेत व्यवस्था गरिरहेको छ ।
प्रतिक्रिया दिनुहोस !
