भक्तपुर : काठमाडौं महानगरपालिकामा काम गर्ने भक्तपुरका ३६ वर्षीय सफाइ मजदुरको द्रूत परीक्षण (आरडीटी) मा कोरोना भाइरस पोजिटिभ देखिएपछि यहाँका दुई ठाउँमा सिल गरिएको छ । भक्तपुर नगरपालिका ५ स्थित योसिंखेल र सूर्यविनायक नगरपालिका ६ स्थित पाण्डोबजार सिल गरिएको हो । भक्तपुर नपा ५ योसिंखेल पुर्ख्यौली घर भएका उनी हाल सूर्यविनायक नपा ६ पाण्डोबजारमा बस्दै आएका हुन् । दुवै ठाउँमा आउजाउ हुने गरेकाले दुवै ठाउँमा सिल गरिएको भक्तपुर प्रहरीले जनाएको छ ।
महानगरीय प्रहरी परिसर भक्तपुरका प्रमुख प्रहरी उपरीक्षक सविन प्रधानले आरडीटी पोजिटिभ देखिएका सफाइ मजदुर र उनको घरपरिवारलाई पाण्डोबजारस्थित घरमै क्वारेन्टाइन गरिएको जानकारी दिए । त्यस्तै योसिंखेल र पाण्डोबजारमा सर्वसाधारणको आवतजावत रोक्न सबै बाटाहरु सिल गरिएको उनले बताए ।‘सफाइ मजदुर र उनको घरपरिवारका सदस्यलाई घरबाहिर निस्कन निषेध गरिएको छ’, प्रहरी उपरीक्षक प्रधानले भने, ‘त्यस्तै पाण्डोबजार जाने सम्पूर्ण नाका सिल गरिएको छ ।’
श्रीमतीको रिपोर्ट नेगेटिभ
काठमाडौं महानगरपालिकाले गरेको द्रूत विधिबाट कोरोना भाइरस परीक्षणमा ३१ जनाको पोजिटिभ देखिएको थियो । जसमध्ये भक्तपुरका ३६ वर्षीय सफाइ मजदुर पनि एक थिए तर उनको श्रीमतीको भने नेगेटिभ आएको प्रहरी उपरीक्षक प्रधानले जानकारी दिए । उनकी श्रीमती पनि काठमाडौं महानगरपालिकाकी सफाइ मजदुर नै हुन् ।
आरडीटी पोजिटिभ देखिएका श्रीमानको पीसीआर परीक्षणसमेत गरिएको छ । शनिबार साँझसम्म उक्त रिपोर्ट आउने प्रहरी उपरीक्षक प्रधानले बताए । उनले पीसीआर परीक्षण पनि पोजिटिभ देखिए उनलाई टेकु अस्पताल लगिने र उनको घरपरिवारका सदस्यहरुलाई क्वारेन्टाइनमा राखिने स्पष्ट पारे । उनका अनुसार हाल ती सफाइ मजदुरको यात्रा विवरण (ट्राभल हिस्ट्री) र उनको सम्पर्कमा आएका व्यक्तिहरुको खोजी भइरहेको छ ।
सशस्त्र प्रहरी जवानका घरपरिवारको रिपोर्ट नेगेटिभ
यसैबीच गएको वैशाख ३० गते कोरोना भाइरस संक्रमण पुष्टि भएका भक्तपुरको चाँगुनारायण नपा १ दुवाकोटस्थित सरस्वतीखेलका सशस्त्र प्रहरी जवानका परिवारको कोरोना परीक्षण रिपोर्ट नेगेटिभ आएको छ । संक्रमितको प्रत्यक्ष सम्पर्कमा रहेका नौजनाकै रिपोर्ट नेगेटिभ आएको प्रहरी उपरीक्षक प्रधानले जानकारी दिए ।
उक्त रिपोर्ट नेगेटिभ आएसँगै ती सशस्त्र प्रहरी कसरी संक्रमित भए भन्ने विषय थप रहस्यमय बनेको छ । यात्रा विवरण नभएका र महिनादिनदेखि घरमै रहेका सशस्त्र प्रहरीका जवानमा कोरोना भाइरस पुष्टि भएको थियो । त्यसैले सरस्वतीखेलमै पहिले नै कोरोना भाइरस संक्रमण फैलिएको हुनसक्ने अनुमान गरिएको छ ।
प्रतिक्रिया दिनुहोस !
