प्रदेश १ का ७ जिल्लामा फैलियो कोरोना, संक्रमितको संख्या ५९ पुग्यो
जेठ ७, २०७७ बुधबार ११:३६:०
विराटनगर : प्रदेश १ का १४ मध्ये ७ जिल्लामा कोरोना संक्रमण फैलिएको छ । सात जिल्लामा कोरोना फैलिँदा संक्रमितको संख्या ५९ पुगेको छ । वैशाख ५ गते उदयपुरको त्रियुगा नगरपालिका ३ स्थित भुल्केमा एकै पटक १२ जना जमातीमा देखिएको कोरोना संक्रमण एक महिनामा ७ जिल्ला सम्म पुगेको हो ।
हालसम्ममा उदयपुर, झापा, भोजपुर, मोरङ, धनकुटा, खोटाङ र सुनसरीमा कोरोना संक्रमण फैलिएको छ। प्रदेश १ का तराई मधेसका जिल्ला बाहेक पहाडका दुई जिल्ला धनकुटा र भोजपुरमा मात्रै कोरोना संक्रमण फैलिएको छ।
धनकुटामा बिरामीबाट कोरोना संक्रमण फैलिएको आशंका गरिएको छ । भोजपुरमा जिल्ला बाहिरबाट गएका युवकमा कोरोना संक्रमण पुष्टि भएको थियो । हाल उनी कोरोना जितेर डिस्चार्ज समेत भइसकेका छन् ।
उदयपुर, झापा, मोरङ र सुनसरीमा भारतबाट नेपाल आएकामा धेरैमा कोरोना संक्रमण पुष्टि भएको प्रदेश १ का सामाजिक विकास मन्त्री जीवन घिमिरे बताउँछन् । खोटाङका संक्रमित युवक भने काठमाडौबाट घर फर्किएका थिए। उनलाई काठमाडौबाट फर्किँदै कोरोना संक्रमण भएको आशंका स्थानीय जनप्रतिनिधिको छ ।
हलेसी तुवाचुङ नगरपालिकाका प्रमुख इवन राईका अनुसार संक्रमित २० वर्षीय युवक गत वैशाख १२ गते काठमाडौंबाट घर आएका थिए । उनलाई होम क्वारेन्टाइनमा राखिएको थियो । सात जिल्लामा कोरोना संक्रमण फैलदा संक्रमितको संख्या ५९ पुगेको छ ।
सबैभन्दा बढी उदयपुरमा ३३ जना संक्रमित छन् । त्यसपछि झापामा १२, धनकुटामा ६, मोरङमा ४, सुनसरीमा २, खोटाङ र भोजपुरमा १-१ जनामा संक्रमण पुष्टि भएको मुख्यमन्त्री तथा मन्त्रिपरिषदको कार्यालयमा रहेको कोरोना सूचना डेस्कले जानकारी दिएको छ ।
संक्रमित मध्ये १८ जना कोरोना जितेर डिस्चार्ज भएका छन्।बाँकी सबैको विराटनगरस्थित कोरोना विषेश अस्पतालमा उपचार भइरहेको छ।
प्रतिक्रिया दिनुहोस !
