विराटनगर : प्रदेश १ का मुख्यमन्त्री शेरधन राईको निर्देशनमा अख्तियारको टोलीले मन्त्रालयका कर्मचारीलाई घुस बुझाउने सिचाँईका हाकिमलाई पक्राउ गरेको छ । जलश्रोत तथा सिचाँई विकास डिभिजन कार्यालय मोरङका डिभिजन प्रमुख आनन्दकुमार झालाई इटहरीस्थित अख्तियारको कार्यालयबाट खटिएको टोलीले बुधबार पक्राउ गरेको हो ।
डिभिजन प्रमुख झाले आर्थिक मामिला तथा योजना मन्त्रालयको बजेट योजना तथा कार्यक्रम महाशाखामा कार्यरत शाखा अधिकृत विदुर पौडेललाई १० हजार रकम बुझाउन खोजेका थिए ।
झाले उक्त रकम खाममा पौडेलको कार्यकक्षस्थित टेबलको घर्रामा राखि दिएका थिए । खाम आफ्नो टेबलको घर्रामा झाले राखिदिएपछि पौडेलले यो के हो भनेर सोध्दा नभनेको पौडेलले बताएका छन् ।
साथै झाले आफूले पौडेललाई १० हजार नगद खाममा राखेर टेबलमा राखिदिएको तर पौडेलले अस्वीकार गरेको बताएका छन् । उक्त घटनापछि शाखा अधिकृत पौडेलले भष्टाचार जन्य कसुरमा सजाय गराई पाउँ भन्दै निवेदन दिएका थिए ।
यो घटनाको जानकारी पाउनसाथ प्रदेश १ का मुख्यमन्त्री शेरधन राईले ठाडो आदेश दिँदै घटनामा संलग्नलाई अख्तियारमा बुझाउन निर्देशन दिए ।
लगत्तै अख्तियारको इटहरीस्थित कार्यालयले झालाई प्रक्राउ गरेको छ । आर्थिक मामिला तथा योजना मन्त्रालयमा महिनौदेखि अन्य मन्त्रालय तथा कार्यालयको फाइल रोकिदै आएको गुनासो हुने गरेको थियो ।
भर्खरै मात्र पौडेल रहेको महाशाखाका प्रमुख उप–सचिव हरिहर पौडेलको सरुवा भएको थियो । उक्त शाखामा कर्मचारीहरुले दुःख दिनुका साथै फाइलसमेत हराउने, फ्याकिने र च्यातिने गरेको गुनासो अन्य मन्त्रालयका कर्मचारीहरुले गर्दै आएका थिए ।
प्रतिक्रिया दिनुहोस !
