भैरहवामा सरकारविरुद्ध प्रदर्शन (फोटो फिचर)

भैरहवा : सरकारको काम प्रति असन्तुष्टि जनाउँदै भैरहवाका युवाले मौन प्रर्दशन गरेका छन् ।

राष्ट्रिय झण्डासहित स्वतस्र्फूत रुपमा उत्रिएका युवाले मौन रहेर पनि प्लेकार्ड बोकेर प्रदर्शन गरेका हुन् । शान्तिपूर्ण रुपमा प्रर्दशन गरेका उनीहरुले कुनै किसिमको नाराबाजी गरेनन् ।  
भैरहवाको बुद्धचोकबाट निकालिएको जुलुस जिल्ला प्रशासन कार्यालय अगाडि पुगेर भौतिक दुरी कायम गर्दै उनीहरु धर्नामा बसेका थिए । 

युवाले कोरोना संक्रमणको नाममा खर्च भएको १० अर्बको हिसाब माग गर्दै उनीहरुले प्रर्दशन गरेका हुन् । युवाले आरडीटी होइन सय प्रतिशत पीसीआर, क्वारेन्टाइन व्यवस्थित हुनुपर्ने, यो लडार्इं होइन दबिएका आवाज हुन्, कर के का लागि ? आक्रोश होइन गुनासो हो, उसले त धोका दियो तर तिमी न देऊ सरकार, जनता भोकै मर्दैछन्, सरकार के गर्दैछ ? जस्ता नारा सहितका प्लेकार्ड लिएर प्रर्दशनमा उत्रिएका थिए ।

विभिन्न पालिकाहरुले निर्माण गरेका क्वारेन्टाइन नेपाल सरकारको मापदण्ड अनुसार नभएको भन्दै यसतर्फ सरकारले ध्यान दिनुपर्ने युवाको माग छ । भैरहवा नागरिक समाजका अगुवा एवं बुद्धिजीवि विजय गोविन्द श्रेष्ठसमेत सहभागी थिए ।  युवाहरुको लाइनदेखि छुट्टै एक्लै सहभागी भएका उनल ‘गलैचा होइन सरकार फेरौँ सस्तो पर्छ’ उल्लेखित नारासहितको प्लेकार्ड बोकेका थिए ।
युवाहरुले पीसीआर दायरा बढाउन र महामारीको समयमा अग्रपंक्तिमा खटिएका सुरक्षाकर्मी र स्वास्थ्यकर्मीको स्वाभिमानको सुनिश्चितताको माग गर्दै रुपन्देहीका प्रमुख जिल्ला अधिकारी माहादेव पन्थलाई ज्ञापनपत्र समेत बुझाएका छन् ।