थप ३ जनामा कोरोना संक्रमण, उदयपुरमा संक्रमितको संख्या ४३ पुग्यो
जेठ ३०, २०७७ शुक्रबार १६:१:०
उदयपुर : उदयपुरमा शुक्रबार थप तीनजनामा कोरोना संक्रमण देखिएको छ। बेलका नगरपालिकाको क्वारेन्टाइनमा रहेका २२, २६, र ३३ वर्षीय पुरुषमा कोरोना संक्रमण पुष्टि भएको हो ।
वीपी कोइराला स्वास्थ्य विज्ञान प्रतिष्ठान धरानको प्रयोगशालामा गरिएको परीक्षणमा उनीहरुलाई कोरोना पुष्टि भएको जिल्ला स्वास्थ्य कार्यालयका प्रमुख मोहनप्रसाद सुवेदीले जानकारी दिए । योसँगै उदयपुरमा कोरोना संक्रमितको संख्या ४३ पुगेको छ ।
संक्रमित सबैजना भारतबाट घर फर्किएका बेलकाबासी हुन् । दिल्लीको गोठगाउँबाट घर आएका वडा नंम्बर ९ का २२ र २६ वर्षीय युवा जेठ २२ गते सिरहाको खाँडो लौकी भन्सारबाट नेपाल भित्रिएको मेयर दुर्गाकुमार थापाले बताए ।
उनीहरुलाई आउनसाथ वडा नं ९ को सिटीहल क्वारेन्टाइनमा राखिएको उनले बताए । त्यस्तै भारतको मुम्बइबाट घर आएका वडा नं ६ का ३३ वर्षीय युवा सुनौली नाकाबाट जेठ १९ गते नेपाल प्रवेश गरेका हुन् ।
उनीलाई वडा नं ६ को मामफाङ्गटोलको सामुदायिक क्वारेन्टाइनमा राखिएको मेयर थापाले बताए । तीनैजनालाई नगरपालिकाले नेपाल भित्रिनासाथ उद्धार गरी नगरपालिकाको क्वारेन्टाइनमा राखेको उनले बताए ।
घर आउनेको संख्या बढ्न थालेपछि नगरपालिकाले सामुदायिक क्वारेन्टाइन स्थापना गरी राख्ने गरेको उनको भनाइ छ । गत २३ गते क्वारेन्टाइनमा रहेका ६७ जनाको स्वाब संकलन गरिएका मध्ये उनीहरुमा संक्रमण देखिएको हो ।
बेलकामा ५८ जना अहिले पनि क्वारेन्टाइनमा छन् । तीन दिनअघि नगरपालिकामा एक महिला र एक पुरुष गरी दुईजना संक्रमण देखिएको थियो ।उनीहरुको बिराटनगरस्थित कोरोना उपचार केन्द्रमा उपचार भइरहेको छ । योसँगै बेलका नगरपालिकामा मात्रै कोरोना संक्रमितको संख्या ५ पुगेको छ ।
त्यसैगरी सबैभन्दा बढी त्रियुगा नगरपालिकामा ३५ जना पुगेको छ । ३५ मध्ये ३३ जना उपचारपछि घर फर्किसकेका छन् । त्यस्तै चौदण्डीगढी, कटारी नगरपालिका र उदयपुरगढी गाउँपालिकामा १÷१ जना यसअघि नै संक्रमित पुष्टि भईसकेका छन् ।
निको हुनेको संख्या बढ्यो
उदयपुरको त्रियुगा नगरपालिका ३ भुल्केस्थित नुरीमस्जिद क्षेत्रमा वैशाख ५ गते एकैसाथ १२ जनामा कोरोना पुष्टि पछि इपिसेन्टर बनेको उदयपुरमा उपचारपछि निको भएर फर्कनेको संख्या बढिरहेको छ ।
हालसम्म ४३ जनामा कोरोना संक्रमण देखिएको मध्ये ३३ जना उपचारपछि निको भएर घर फर्किसकेका छन् । सबैजना त्रियुगा नगरपालिकाका हुन् । नगरपालिकाको वडानं ११ का एक पत्रकार र बाँकी ३२ जना वडा नं ३ भुल्केका हुन् । तीन पटकसम्म गरिएको स्वाब परीक्षणमा नेगेटिभ देखिएपछि उनीहरुलाई घर फर्काइएको थियो ।
निको भएर फर्किएका उनीहरुलाई नगरपालिकाले पुनः एक हप्तासम्म क्वारेन्टाइनमा राखेर घर पठाएको थियो ।
प्रतिक्रिया दिनुहोस !
