रामेछापमा बोलेरो दुर्घटना : दुई जना घाइते, हेलिकप्टरमार्फत काठमाडौं ल्याइँदै
जेठ ३२, २०७७ आइतबार १०:८:०
काठमाडौं : रामेछाप जिल्लामा बोलेरो दुर्घटना हुँदा २ जना घाइते भएका छन्। आइतबार बिहान पौने ९ बजेतिर सुनापति गाउँपालिका-४ लोप्राङमा बा १४ च १६१७ नम्बरको बोलेरो दुर्घटना हुँदा चालक र अर्का एक जना घाइते भएको जिल्ला प्रहरी कार्यालय रामेछापका प्रवक्ता टेकेन्द्र पौडेलले जानकारी दिए।
उनका अनुसार सुनापति गाउँपालिका-४ बेथानका करिब ४० वर्षीय चालक कल्याण खत्री र १४ वर्षीय रविन खत्री घाइते भएका छन्। पौडेलले चालकको अवस्था गम्भीर रहेको बताए। उनले भने, 'चालकको हात, खुट्टा र टाउकोमा गम्भीर चोट लागेकाले हेलिकप्टरबाट उपचारका लागि काठमाडौं लैजाने तयारी भइरहेको र युवकको खुट्टामा चोट लागेकाले एम्बुलेन्समार्फत काठमाडौं पठाइसकिएको छ।'
लोप्राङबाट बेथान जाँदै गरेको बोलेरो सडकबाट २ सय मिटर तल खसेको प्रहरीले जनाएको छ। बुलेरोमा २ जनामात्र सवार थिए। प्रहरीले दुर्घटना कसरी हुन पुग्यो भन्ने सम्बन्धमा अनुसन्धान थालेको छ।
प्रतिक्रिया दिनुहोस !
